काठमाडौँ । अदालतले धरौटीमा छाड्न आदेश दिएका क्रिकेटर सन्दीप लामिछानेलाई क्याप्टेनमा पुनर्वहाली गर्न उनका वकिल सरोजकुमार घिमिरेले क्यानलाई सुझाव दिएका छन् ।
लामिछानेको रिहाइ प्रक्रिया सुरूसँगै वकिल घिमिरेले उनी राष्ट्रिय टिममा फर्किन नरोकिने बताएका हुन् । उनले खेलको विषयमा अदालतले कुनै आदेश गर्नुपर्ने आवश्यक नरहेको बताए ।
‘खेलको विषयमा आदेश गर्नुपर्ने आवश्यक नै छैन । सन्दीप थुनामा परेकाले सस्पेन्सन गरेको । थुना बाहिर भएकाले क्यानले क्याप्टेनसिप फिर्ता दिनुपर्ने हुन्छ । हेर्नुस् न क्रिकेट कुन अवस्थाबाट गुज्रिएको छ । सिरियसली नै क्यानले क्रिकेटलाई महत्वपूर्ण लिन्छ भने उनलाई क्याप्टेनको रूपमा लिनुपर्छ । दोषी त करार भइसकेको छैन ‘, घिमिरेले भने ।
घिमिरेले सन्दीप साढे २ बजेसम्ममा रिहा हुने जानकारी दिएका छन् । ‘धरौटीको रकम परिवारले जम्मा गर्दै हुनुन्छ । उच्चबाट फायल जिल्लामा गएपछि पत्र लिएर आउने र स्वास्थ्य जाँच हुनेछ । तारेख लिने काम हुन्छ । साढे २ बजेसम्ममा उनी छुट्छन्’, उनले भने ।
बलात्कारको मुद्दामा पुर्पक्षका लागि थुनामा रहेका लामिछानेलाई उच्च अदालत पाटनले बिहिवार २० लाख धरौटीमा छाड्न आदेश दिएको थियो । सन्दीप थुनामुक्त भएपनि अदालतको सर्तहरु पालना गर्नुपर्ने उनका वकिलले बताए । उनले भने, ‘महत्वपूर्ण सर्त छन् । सन्दीपले पालना गर्नुपर्ने हुन्छ । यस्तो अपराधमा यो युनिक आदेश हो ।’
