काठमाडौँ । जनता समाजवादी पार्टी (जसपा) र नेकपा (एकीकृत समाजवादी) ले एकता गर्नुअघि मोर्चा बनाउने सहमति गरेका छन् । बिहीबार दुई दलबीच भएको वार्तामा मोर्चा बनाउने सहमति भएको हो ।
एकताका लागि केही समय लाग्ने भएपछि दुई पार्टीबीच मोर्चा बनाएर अघि बढ्ने सहमति भएको बताइएको छ । शनिबार हुने वार्तामा दुवै पक्षबाट आ–आफ्नो पार्टीको एजेन्डा प्रस्तुत गर्ने र त्यसमा एक–एक विषयमा छलफल गर्दै जानेसमेत सहमति भएको बुझिएको छ ।
दुवै पार्टीले राख्ने एजेन्डामाथि छलफल गर्दा सरल र जटिल विषयवस्तु सूचीकृत गर्दै जाने तथा सहमति हुन सक्ने विषयलाई टुंग्याउँदै जान सहमति भएको बताइएको छ । त्यस्तै सहमति हुन नसक्ने जटिल विषयलाई सूचीकृत गरी शीर्ष तहबाट टुंगो लगाउनेसमेत सहमति भएको छ ।
शनिबार बस्ने बैठकमा दुवै पार्टीले आ–आफ्नो घोषणापत्र, विधान, राजनीतिक प्रतिवेदन, पार्टीका अन्य दस्तावेज प्रस्तुत गर्ने निर्णय भएको छ ।
