काठमाडौँ । नेपाली कांग्रेसका सभापति शेरबहादुर देउवाले पार्टी पदाधिकारी बैठक बोलाउनुभएको छ । आजै दिउँसो २ बजे बस्नेगरी आफ्नो निवास धुम्बाराहीमा सभापति देउवाले बैठक बोलाउनुभएको हो ।
बैठकमा पार्टीको सांगठानिक सुदृढीकरण तथा समसामयिक राजनीतिक घटनाक्रमका बारेमा छलफल हुने जनाइएको छ ।
नेपाली कांग्रेसभित्र प्रतिनिधिसभाको बैठकमा प्रधानमन्त्री पुष्पकमल दाहाल प्रचण्डलाई विश्वासको मत दिएपछि असन्तुष्टि बढेको छ । पदाधिकारी बैठकले विश्वासको पक्षमा मत दिने वा नदिने भन्नेबारे निर्णय गर्न नसकेपछि विश्वासको मत नदिने पक्षमा रहेका नेताहरुले केन्द्रीय कार्यसमितिको बैठकबाट निर्णय हुनुपर्ने माग गर्नुभएको थियो ।
तर मतदान गर्ने दिन केन्द्रीय कार्यसमितिको बैठकमा अधिकांश सदस्यहरु उपस्थित हुननसक्ने भएपछि केन्द्रीय कार्यसमितिले गर्ने निर्णयको अधिकार केन्द्रीय कार्यसम्पादन समितिलाई दिइएको थियो ।
केन्द्रीय कार्यसम्पादन समितिको बैठकमा प्रधानमन्त्री प्रचण्डलाई विश्वासको मत दिने निर्णय भए पनि महामन्त्रीद्वय गगन थापा र विश्वप्रकाश शर्मासहित केही नेताहरुले निर्णयमाथि फरक मत राख्नुभएको थियो ।
प्रधानमन्त्री प्रचण्डलाई विश्वासको मत दिएपछि प्रमुख प्रतिपक्षीको भूमिका कांग्रेसले गुमाएको भन्दै सभापति देउवाको आलोचनासमेत भइरहेको छ ।
