काठमाडौँ । राष्ट्रिय प्रजातन्त्र पार्टी नेपालका अध्यक्ष कमल थापाले पृथ्वी जयन्तीको दिन राज्यस्तरबाटै राष्ट्रिय एकता दिवसको रुपमा मनाउनुपर्ने बताउनु भयो ।
बुधवार ३०१ औँ पृथ्वी जयन्तीको अवसरमा राप्रपाले काठमाडौंमा आयोजना गरेको जलपान कार्यक्रमपछि सञ्चारकर्मीहरुसँग संक्षिप्त कुराकानी गर्दै उहाँले नेपाली भन्ने नाम र पहिचान पृथ्वीनारायण शाहले दिएको उल्लेख गर्दै प्रत्येक नागरिकले शाहप्रति सम्मान व्यक्त गर्नुपर्ने बताउनु भयो ।
उहाँले भन्नुभयो – ‘राप्रपा मेरो पनि पार्टी हो । यो पार्टी स्थापना र पार्टीलाई उचाइमा पुर्याउनको निमित्त मैले धेरै ठूलो मेहनत गरेको छु । रगत पसिना बगाएको छु । त्यसैले राप्रपाको कार्यक्रममा सहभागि हुँदाखेरी स्वभाविक रुपमा मलाई खुशी लाग्छ र गौरवको अनुभव हुन्छ ।
केही विचारमा भिन्नताको कारणले हामी अलग अलग छौँ तर म जहिले पनि राप्रपाको उत्तरोत्तर प्रगतीको कामना गर्दछु । अहिले जेजस्तो किसिमको सफलता उहाँहरुले हाँसिल गर्नुभएको छ त्यो प्रशंसनीय छ । पृथ्वीनारायण शाह केवल एउटा राजनीतिक व्यवस्था वा राजनीतिक विचारसँग सम्बन्धित होइनन् । उनले हामीलाई नेपाली भन्ने नाम र पहिचान दिएका छन् । त्यसअर्थ नेपाली भएकोमा गर्व गर्ने प्रत्येक नागरिकले राष्ट्र निर्माताप्रति सम्मान व्यक्त गर्नुपर्दछ ।
राष्ट्रिय एकता दिवस राज्य स्तरबाटै भव्य रुपमा मनाउनुपर्छ भन्ने मलाई लाग्दछ । सरकारले पृथ्वी जयन्तीमा जुन सार्वजनिक बिदा दिएको छ, त्यसको निमित्त म सरकारलाई धन्यवाद दिन चाहन्छु । यो प्रयास भएकोमा राप्रपालाई पनि धन्यवाद । आगामी दिनमा केवल बिदा दिने मात्र होइन राज्यस्तरबाटै राष्ट्रिय एकता दिवस मनाउने काम हुनुपर्दछ ।’
केही समय अघि राप्रपा त्यागेर अर्को पार्टी गठन गरेका अध्यक्ष थापाले राप्रपामा आफूले रगत र पसिना बगाएको भन्दै राप्रपाको कार्यक्रममा आउन पाउँदा खुशी र गौरवको अनुभुति हुने बताउनु भयो । राप्रपाले हाल पाएको सफलता प्रशंसनीय भएको भन्दै उहाँले अझ उन्नति र प्रगतिको कामना गर्नुभयो ।
