पोखरा । गण्डकी प्रदेशमा पूरै कार्यकाल नेकपा (एमाले) ले मुख्यमन्त्री पाएपछि प्रदेश माओवादी केन्द्रमा असन्तुष्टि देखिएको छ । माओवादी केन्द्र प्रदेश संसदीय दलका नेता हरिबहादुर चुमानले एमालेलाई पूर्ण कार्यकाल मुख्यमन्त्री दिने केन्द्रको निर्णयप्रति असन्तुष्टि जनाउनुभएको छ ।
उहाँले गण्डकी प्रदेशको सरकारको नेतृत्व आफूले पाउनुपर्ने बताउँदै आउनुभएको थियो । सत्ता साझेदरा दलबीच भएको प्रदेश भागबन्डामा गण्डकीको मुख्यमन्त्री पूरै कार्यकाल एमालेको भागमा परेको छ । सहमतिअनुसार सभामुख माओवादीले पाउने छ भने उपसभामुख एमालैको भागमा परेको छ ।
गण्डकी प्रदेशमा मुख्यमन्त्रीमा दाबी गर्ने समयसीमा आज अन्तिम दिन हो । प्रदेश प्रमुख पृथ्वीमान गुरुङले दुई वा दुई दलको समर्थनमा बहमुत जुटाउन सक्ने प्रदेशभा सदस्यलाई मुख्यमन्त्रीमा दाबी गर्न आजसम्मको समय दिनुभएको छ ।
केन्द्रले मुख्यमन्त्री एमालेलाई दिएको मिडियामा आएको भए पनि निर्णय भने अझै नपठाइसकेको भन्दै नेता चुमानले केन्द्रको निर्णय नआई सरकारमा कसरी जाने भनी प्रश्न गर्नुभयो ।
केन्द्रले एमालेलाई मुख्यमन्त्री बनाउने सहमति गरेपछि एमाले संसदीय दलका नेता खगराज अधिकारी पूरै कार्यकाल मुख्यमन्त्री बन्दै हुनुहुन्छ । गण्डकी प्रदेशमा एमालेका २२, माओवादी केन्द्रका ८ र राप्रपाका २ प्रदेशसभा सदस्यको समर्थनमा अधिकारी मुख्यमन्त्री बन्दै हुनुहुन्छ । ६१ सदस्यीय प्रदेशसभामा नेपाली कांग्रेसका २७ र नेकपा (एकीकृत समाजवादी) का दुई प्रदेशसभा सदस्य हुनुहुन्छ ।
