काठमाडौं । राजधानीमा जारी रहेको नेपाल टी–२० लिगमा फार वेस्ट युनाईटेडले काठमाडौं नाईट्सलाई ८४ रनले पराजित गरेको छ ।
किर्तिपुरको टियु मैदानमा भएको खेलमा फार वेस्टले दिएको १ सय ९८ रनको लक्ष्य पछ्याएको काठमाडौंले २० ओभरमा ९ विकेट गुमाएर १ सय १४ रन बनायो ।
काठमाडौंका लागि ब्याटिङमा कमलसिंह ऐरीले २१ बलमा २० रन बनाए । यस्तै कप्तान ज्ञानेन्द्र मल्ल र सन्दिप रजालीले समान १७र१७ रन बनाए भने सुनाम गौतम १६ रनमा आउट भए । विरनदिप सिंहले १४ रन जोडे भने सन्तोष कार्की १२ रनमा आउट भए ।
फार वेस्टका लागि बलिङ गरेका करण केसी,दुर्गेश गुप्ता र कप्तान हसमतुल्लाह शाहिदीले समान २/२ विकेट लिए । यस्तै मिलण्डा सिरिबद्र्धने,प्रकाश जैशी र शेर मल्लले भने समान १/१ विकेट लिए ।
त्यसअघि पहिले ब्याटिङ गरेको फार वेस्टले २० ओभरमा ४ विकेट गुमाएर १ सय ९७ रन बनायो । फार वेस्टका लागि विनोद भण्डारी र कप्तान हजमतुल्लाह शाहिदीले १ सय ५७ रनको शतकीय साझेदारी खेले । नेपाल टी–२० लिगको ईतिहासमा यो सबैभन्दा ठूलो साझेदारी हो ।
टस जितेर पहिले ब्याटिङ रोजेको फार वेस्टका लागि हसमतुल्लाह शाहिदी र विनोद भण्डारीले अर्धशतकीय ईनिङ खेले । हसमतुल्लाहले ५७ बलमा ६ चौका र ५ छक्काको सहयोगमा ७६ रन बनाए । यस्तै भण्डारीले ४४ बलमा ६ चौका र ५ छक्काको सहयोगमा ७३ रन बनाए। करण केसीले २२ रन जोडे भने उमर अलिले ७ रन बनाए ।
काठमाडौंका लागि बसिर अहमदले एकै ओभरमा तिन विकेट लिए भने अविनाश बोहोराले १ विकेट लिए ।
फार वेस्टले आठ खेलमा दुई जित हात पारेर ४ अंकका साथ अंक तालिकाको पुछारमा रहेको छ भने काठमाडौं नौ खेलमा चार जित पाँच हारसहित अंक तालिकामा तेस्रो स्थानमा रहेको छ । दुबै टिम प्लेअफमा जाने उत्तिकै सम्भावना रहेको छ ।
यस लिगमा काठमाडौं नाइट,पोखरा एभेन्जर्स,फार वेस्ट युनाईटेड,जनकपुर रोयल्स,विराटनगर सुपर किंग्स र लुम्बिनी अल स्टार रहेका छन् ।
