काठमाडौँ । माधव नेपाल नेतृत्वको नेकपा (एकीकृत समाजवादी) र उपेन्द्र यादव नेतृत्वको जनता समाजवादी पार्टी (जसपा) बीच पार्टी एकतालाई लिएर बहस सुरु भएको छ ।
अहिले जसपाको राजनीतिक समितिको बैठकमा यसबारे छलफल भइरहेको बताइएको छ । राजनीतिक समितिको बैठकमा सदस्यहरुले धारणा राख्ने क्रम भइरहेको छ ।
एकीकृत समाजवादीका प्रचार विभाग प्रमुख जगन्नाथ खतिवडाले पनि सोमबार पत्रकारहरुसँग जसपासँग पार्टी एकताबारे छलफल भइरहेको बताउनुभएको थियो ।
माधव नेपालले नेकपा (एमाले) बाट अलग भएर गठन गर्नुभएको एकीकृत समाजवादी विसं २०७८ भदौ ९ गते निर्वाचन आयोगमा दर्ता भएको थियो । एकीकृत समाजवादीले गत मंसिर ४ गते भएको प्रतिनिधिसभा निर्वाचनमा प्रत्यक्षतर्फ १० सिट जितेको थियो । आवश्यक थ्रेस होल्ड कटाउन नसक्दा उक्त पार्टी राष्ट्रिय पार्टी बन्न वञ्चित भएको थियो ।
त्यस्तै उपेन्द्र यादव नेतृत्वको जसपाले प्रत्यक्षतर्फ ७ र समानुपातिकतर्फ ५ सिट गरी कूल १२ सिट जितेको थियो । दुवै पार्टीबीच एकता भए कूल २२ सांसद हुनेछन् र प्रतिनिधिसभामा चौथो ठूलो दल बन्नेछ । अहिले राष्ट्रिय स्वतन्त्र पार्टी (रास्वपा) २० सिटसहित चौथो ठूलो दल हो ।
