काठमाडौं। सत्तारुढ नेकपा (एकीकृत समाजवादी)ले एमसीसी संसदमा टेवल गर्न दिने संकेत गरेको छ । शनिबार काठमाडौंमा बसेको पार्टी स्थायी कमिटी बैठकले एमसीसी संसदमा छलफल गर्न दिने कुरालाई निषेध गर्न नहुने निष्कर्ष निकालेको हो । तर यथास्थितिमा भने संसदबाट सो प्रस्ताव पारित गर्न दिन नहुने पार्टीको अडान भने यथावत रहेको प्रवक्ता जगन्नाथ खतिवडाले जानकारी दिनु भयो । \बैठकले एमसीसी जनताको भावना र राष्ट्रको हित अनुकूल हुने गरी अघि बढाउनुपर्नेमा जोड दिँदै त्यसका लागि आवश्यक निर्णय लिने अधिकार पार्टीको केन्द्रिय सचिवालयलाई दिएको छ । त्यसबारेमा जनताको बीचमा बहस गर्नुपर्ने र जनप्रतिनिधिहरुलाई पनि यसबारे जानकारी दिनुपर्ने सो पार्टीको बुझाई छ ।
प्रवक्ता खतिवडाले भन्नुभयो, ‘यथास्थितिमा अर्थात् उसले राखेको सेवा, सर्तहरुको अधिनमा एमसीसी पारित गर्न दिन सकिदैन भन्ने हाम्रो स्थायी समिति बैठकले सर्वसम्मत निर्णय गरेको छ । यसका बारेमा थप निर्णय गर्नका लागि केन्द्रिय सचिवालयलाई जिम्मेवारी दिएको छ । र, नेपाली जनताको भावना, राष्ट्रिय हित र बैचारिक प्रतिवद्धता समेतको आधारमा रही हामीले आफ्नो निर्णय गरेका छौं भन्ने हाम्रो पार्टीको ठहर रहेको छ । त्यसलाई व्यापक रुपमा आम जनताको बीचको बहस नगरी नहुने र जनताका प्रतिनिधिहरुले यसबारेमा जानकारी नलिई नहुने, यसका कानुनी समस्याहरु र अन्य प्रकारका समस्याहरु थुप्रै रहेको र सम्झौंतामा धेरै विरोधाभाष रहेकाले संशोधन गरेर मात्रै, राष्ट्रहित अनुकूल बनाएर मात्रै यसलाई पारित गर्न सकिन्छ भन्ने पार्टीको धारणा रहेको छ । छलफलका लागि यो सम्झाैता संसदमा टेवल भएमा हामीलाई आपत्ति हुनेछैन र तर संशोधन भने हुनै पर्छ ।’
नेकपा (एकीकृत समाजवादी)ले सो सम्झौताबारे अध्ययन गर्न झलनाथ खनाल नेतृत्वको कार्यदल नै गठन गरेको थियो । कार्यदलले पनि बैठकमा यथास्थितिमा एमसीसी पारित गर्न नमिल्ने सुझाव दिएको प्रवक्ता खतिवडाले बताउनु भयो ।
