एजेन्सी । कतारमा सम्पन्न फिफा विश्वकप २०२२ को विजेता टोली अर्जेन्टिना स्वदेश पुगेको छ । लियोनल मेसीको कप्तानीमा रहेको अर्जेन्टिना मंगलबार बिहान अर्जेन्टिनाको राजधानी व्युनस आयर्सस्थित एजेइजा अन्तर्राष्ट्रिय विमानस्थलमा अवतरण गरेको हो ।
विमानस्थलमा अर्जेन्टिनाको टोलीलाई हजारौँ समर्थक स्वागतका लागि त्यस स्थानमा पुगेका थिए । अर्जेन्टिनी टिम २१ घण्टा लामो यात्रापछि व्युनस आयर्स पुगेको हो ।
अर्जेन्टिनाले आइतबार विश्वकप उपाधि जित्दा लियोनेल मेसीले २ तथा एञ्जल डी मारियाले १ गोल गरेका थिए । फ्रान्सका लागि सबै तीन गोल केलिएन एम्बाप्पेले गरेका थिए ।
निर्धारित समय र अतिरिक्त समयसम्म ३–३ गोल भएपछि खेलको निर्णय पेनाल्टी सुटआउटबाट भएको थियो । जहाँ ४–२ ले अर्जेन्टिनाले जित निकाल्दै तेस्रो पटक विश्वविजेता बन्यो ।
