एजेन्सी । दक्षिण अमेरिकी राष्ट्र अर्जेन्टिनाले ३६ वर्षपछि फिफा विश्वकप फुटबल प्रतियोगिताको उपाधि उचाल्यो ।
कतारको दोहास्थित लुसेल रङ्गशालामा आइतबार भएको २२औँ संस्करणको फाइनल खेलमा फ्रान्सलाई टाइब्रेकरमा ४–२ गोलअन्तरले हराउदै अर्जेन्टिनाले विश्वकपको उपाधिमा ह्याट्रिक गरेको हो । यसअघि अर्जेन्टिनाले सन् १९७८ र १९८६ मा दुई पटक उपाधि जितिसकेको छ ।
जितको विश्वभर उत्सव मनाइयो । भारतका मानिसहरूले पनि यो खेलको आनन्द लिए । खेलपछि अर्जेन्टिना र मेसीका फ्यानले पनि जितको खुसी मनाएका थिए । केरलामा अर्जेन्टिनाको जितको खुसीयाली मनाइयो । तर, यस अवधिमा हिंसात्मक घटनाहरू पनि बाहिर आएका छन् ।
केरलाको कन्नूरमा फ्रान्स र अर्जेन्टिनाका समर्थकबीच झडप भएको छ । यस क्रममा तीन जना घाइते भएका छन् । जसमध्ये एक जनाको अवस्था चिन्ताजनक रहेको प्रहरीले जनाएको छ । झडपका क्रममा चक्कु प्रहार समेत गरिएको थियो ।
प्रहरीका अनुसार घटना पल्लियामुला नजिकै भएको हो । अर्जेन्टिनाका फ्यानहरूले फ्रेन्च फ्यानलाई गाली गरे, जसको परिणाम हिंसामा बदलियो । प्रहरीले ६ जनालाई नियन्त्रणमा लिएको छ । अर्जेन्टिनाको जितपछि खुसीयाली मनाउने मानिसहरूलाई सम्हाल्ने क्रममा दुई प्रहरी अधिकारीमाथि आक्रमण समेत भएको थियो ।
कार्यक्रमस्थलमा हड्ताल मच्चाउने दुई युवालाई हटाउने क्रममा हवल्दारमाथि आक्रमण भएको हो । प्रहरीका अनुसार कोल्लममा एक १७ वर्षीय युवक अक्षय कुमारको स्थानीय स्टेडियमबाट अर्जेन्टिना प्रशंसकहरूको विजय र्यालीको क्रममा मृत्यु भएको छ ।
