काठमाडौं । नवनियुक्त स्वास्थ्य राज्यमन्त्री उमेश श्रेष्ठले गरीब जनतालाई कोरोना खोपको आवश्यक व्यवस्था गर्ने कामलाई आफूले उच्च प्राथमिकता दिने प्रतिवद्धता व्यक्त गर्नु भएको छ ।
सिंहदरवारस्थित प्रधानमन्त्री तथा मन्त्रीपरिषद कार्यालयमा आईतबार अपरान्ह पद तथा गोपनियताको सपथ ग्रहण गरेलगत्तै उहाँले संचारकर्मीमाझ संक्षिप्त प्रतिक्रिया दिँदै गरिव जनतालाई कोरोना खोपको आवश्यक व्यवस्था गर्ने कामलाई आफूले पहिलो प्राथमिकता दिने बताउनु भयो । राज्यमन्त्री श्रेष्ठले कोरोनाको तेस्रो लहर आउन नदिने विषयमा विज्ञहरुसँग छलफल गरी अल्पकालीन र दीर्घकालीन योजना बनाई अघि बढने जानकारी समेत दिनुभयो ।
काठमाडौं उपत्यका बाहिर कोरोना खोपको आवश्यक्त व्यवस्था मिलाउने नवनियुक्त राज्यमन्त्री श्रेष्ठको योजना छ । “गरिव भन्दा गरिव जनताले कसरी स्वास्थ्य सेवा पाउन सक्छन ? मेरो पहिलो प्राथमिकता भनेको कोरोना विरुद्धको खोप हो । त्यसको आवश्यक व्यवस्था मिलाउने छु । त्यसै गरी कोरोनाको तेस्रो लहर लाग्न नदिन विज्ञहरुसँग छलफल गरी अल्प कालीन र दीर्घकालीन योजना बनाएर अघि बढनेछु । काठमाडौं उपत्यका बाहिर पनि खोपको आवश्यक व्यवस्था गर्न लागिपर्नेछु ।”
स्वास्थ्य राज्यमन्त्री श्रेष्ठले सपथग्रहण गरेलगत्तैै मन्त्रालयका पुगेर पदभार ग्रहण समेत गर्नु भयो । राष्ट्रपति विद्या भण्डारीले यस अघि प्रधानमन्त्री शेरबहादुर देउवाको सिफारिसमा उहाँलाई स्वास्थ्य राज्यमन्त्रीमा नियुक्त गर्नु भएको थियो ।
