काठमाडौँ । ह्याम्स अस्पतालको शय्याबाटै एक जोडीको विवाह भएको छ । एपेन्डिसाइटिसको शल्यक्रिया गरेर अस्पताल बसेका नवीन गिरी र जर्मन नागरिक इंकाबीच अस्पतालमै विवाह भएको हो । बिरामी भएर अस्पतालमै विवाह भएको नेपालमा सम्भवतः यो पहिलो घटना हो ।
मंसिर २७ गते नवीन र इंकाबीच चन्द्रागिरिमा विवाह गर्ने तय भएको थियो । विवाहका लागि इंकाका बुबाआमा र आफन्त पनि जर्मनीबाट नेपाल आइसकेका थिए ।
तर विवाह हुनुभन्दा अघिल्लो रात नवीनलाई एक्कासि पेट दुखेपछि ह्याम्स अस्पताल भर्ना भए । उनलाई एपेन्डिसाइटिस भएपछि निर्धारित साइतमा विवाह हुन नसक्ने अवस्था आयो । एपेन्डिसाइटिसको शल्यक्रिया गर्नेबित्तिकै विवाह गर्न जोखिम हुने र विवाहको मिति सार्दा माघ महिनामा मात्र हुने साइत जुर्यो ।
तर इंकाका बुबाआमा र आफन्त पनि चाँडै जर्मनी फर्किनुपर्ने थियो । त्यसपछि सीमित आफन्त, चिकित्सक र नर्सको उपस्थितिबीच ह्याम्स अस्पतालको ९१५ नम्बर बेडमा नवीन र इंकाबीच विवाह भएको अस्पतालले जनाएको छ । विवाहमा उपस्थित चिकित्सक र नर्सले पनि दुवैलाई बधाई दिएका थिए ।
फोटो- ह्याम्स अस्पताल
