काठमाडौं । आज बालुवाटारमा बसेको सत्तारूढ गठबन्धनको बैठक सकिएको छ। आजको बैठक लगभग २ घन्टासम्म बालुवाटारमा बसेको थियो। बैठकमा मन्त्रिमण्डल बिस्तारबारे छलफल भएपनि निष्कर्ष भने ननिस्किएको बताईएको छ ।
बैठकमा कांग्रेसबाट प्रधानमन्त्री देउवासहित वरिष्ठ नेता रामचन्द्र पौडेल, महामन्त्री पूर्णबहादुर खड्का र कृष्णप्रसाद सिटौला तथा माओवादी केन्द्रका अध्यक्ष प्रचण्ड सहभागी छन् भने जसपाबाट अध्यक्ष उपेन्द्र यादव, डा. बाबुराम भट्टराई र अशोक राई तथा जनमोर्चाका अध्यक्ष चित्रबहादुर केसी सहभागी थिए ।
बैठकमा एमालेको माधव नेपाल पक्षको समेत प्रतिनिधित्व रहेको थियो । नेपाल समूहबाट डा. विजय पौडेल बैठकमा सहभागी थिए । यतिबेला देउवा नेतृत्वको सरकारमा कांग्रेसबाट दुई मन्त्री र एक राज्यमन्त्री छन् भने माओवादीबाट दुई जना मन्त्री छन्। जसपाको आधिकारिकता अध्यक्ष यादव नेतृत्वले पाएसँगै गठबन्धन बैठक बसेको हो ।
