काठमाडौँ । नेकपा (माओवादी केन्द्र) का उपमहासचिव वर्षमान पुनको चीनमा उपचार सुरु भएको छ । जटिल प्रकारको वंशाणुगत जन्डिसबाट पीडित पुनको चीनको सेनजेनस्थित थर्ड पिपुल्स अस्पतालको क्वारेन्टिनमा उपचार सुरु भएको पुनको सचिवालयले जनाएको छ ।
उपचारका लागि पुन यही मंरि १६ गते चीन जानुभएको थियो । उहाँको सो रोगको उपचार यसअघि पनि सोही अस्पतालमा भएको थियो । सुमेरु अस्पतालमा गत वर्ष उपचार सम्भव नभएपछि उहाँ थाइल्यान्डको राजधानी बैंककस्थित समितिभेज अस्पताल जानुभएको थियो ।
त्यहाँ उहाँले दुई महिना उपचार गराउँदा पनि सन्तोषजनक सुधार नभएपछि त्यहीँबाट चीनको सेनजेन उपचारका लागि जानुभएको थियो । चीनमा उपचारपछि उहाँ गत वर्षको माघ १० गते काठमाडौँ फर्कनुभएको थियो ।
निर्वाचनको समयमा उहाँको रोग पुनः बल्झिएपछि थप उपचारका लागि उहाँ चीन जानुभएको हो ।
