काठमाडौँ। धनगढी अहिले तनावग्रस्त बनेको छ । विद्यार्थीहरु निषेधाज्ञा तोडेर प्रदर्शनमा उत्रिएपछि परिस्थिति नियन्त्रणमा लिन प्रहरीले अश्रुग्यास प्रहार गरेपछि स्थिति तनावग्रस्त बनेको हो । जिल्ला प्रशासन कार्यलय कैलालीले निषेधाज्ञा जारी गरेको थियो ।
निषेधाज्ञा लागू गरिएको घटनास्थल आसपासमा प्रहरीले डेढ दर्जनजति अश्रुग्यास प्रहार गरेपछि विद्यार्थीहरु तितरबितर भएका थिए । प्रहरीले विद्यार्थी र महिला गरी ११ जनालाई नियन्त्रणमा लिइएको जनाएको छ ।
ग्रेडरको ठक्करबाट १५ वर्षीय चेतना साउदको मृत्यु भएपछि विद्यार्थीले प्रदर्शन गरेका थिए । स्थितिलाई नियन्त्रणमा लिन प्रशासनले निषेधाज्ञा जारी गरेको हो । विद्यार्थीहरुले न्याय र दोषीमाथि कडा कारवाहीको माग गर्दै बिहीबार बिहानैदेखि हिंसात्मक प्रदर्शन गरेका थिए ।
उनीहरुले पीडित परिवारलाई उचित क्षतिपूर्ति दिनुपर्ने माग गरेका छन् । बिहीबार बिहान धनगढी उपमहानगरपालिका–५ स्थित पिपलचौतारा नजिकै कालिका कन्स्ट्रक्सनको ना १ क ९७५ नम्बरको ग्रेडरले ठक्कर दिँदा साइकलमा विद्यालय गइरहेकी १५ वर्षीया साउदको घटनास्थलमै मृत्यु भएको थियो ।
पञ्चोदय माध्यमिक विद्यालयमा अध्ययनरत साउदको मृत्यु भएपछि सो विद्यालयका विद्यार्थीहरुले बिहीबार दिनभर धनगढीमा प्रदर्शन गरेका थिए र उनीहरुले घटनास्थलबाट शवलाई उठाउन दिएका थिएनन् ।
प्रशासनले बिहीबार साँझदेखि नै निषेधाज्ञा जारी गरेको थियो । निषेधाज्ञापछि प्रहरीले शव उठाएर लगेको थियो । त्यसक्रममा विद्यार्थीहरुले नाराबाजी गर्दै प्रदर्शन गरेका थिए ।
