काठमाडौं । राष्ट्रिय भूमि आयोगले सुकुम्बासीलाई तत्काल नहटाउन आग्रह गरेको छ ।
काठमाडौं महानगरपालिकाले सुकुम्बासी बस्ती हटाउने प्रयास गरेपछि आयोगले शुक्रबार एक सूचना जारी गर्दै अहिले नै सुकुम्बासीलाई नहटाउन आग्रह गरेको हो ।
आयोगले सबै स्थानीय तह र सबै सरकारी तथा गैह्र सरकारी निकायहरूलाई देशभर रहेका भूमिहीन दलित, भूमिहीन सुकुम्बासी र अव्यवस्थित बसोबासीका बस्ती हटाउने र उनीहरू असुरिक्षत हुने गरी कुनै पनि काम नगर्न भनेको छ ।
राष्ट्रिय भूमि आयोग र स्थानीय तहहरूबीच भूमिहीन दलित, सुकुम्बासी तथा अव्यवस्थित बसोबासीको व्यवस्थापन गर्नका लागि ३५ दिने सूचना प्रकाशित भएको थियो । तर निर्वाचन आयोगको निर्देशनअनुसार गत भदौ ३१ बाट यो काम स्थगन भएको थियो । आयोगले आचारसंहिता लागू नहुने सूचना जारी गरुन्जेलसम्म सुकुम्बासी बस्ती नहटाउन आग्रह गरेको हो ।
थापाथलिको सुकुम्बासी बस्ती हटाउन पुगेका महानगरको टोली र बस्तीका बासिन्दाबीच झडप भएको थियो । झडपका क्रममा नगर प्रहरी र सुकुम्बासी बस्तीका केही मानिसहरु घाइते भएका थिए ।
