काठमाडौं । नेकपा एमालेका सांसद विशाल भट्टराईले केही दलहरुले सडकमा आन्दोलन गर्ने र संसदमा साथ दिने नाटक गरिरहेको आरोप लगाउनु भयो । उहाँले आफ्नो पार्टीको माग पूरा नहोउन्जेलसम्म पार्टीले संसदमा अवरोध गरिरहने बताउनु भयो ।
आईतबार प्रतिनिधिसभाको बैठकपछि सञ्चारकर्मीहरुसँग कुरा गर्दै सांसद भट्टराईले यस्तो बताउनु भएको हो ।
सांसद भट्टराईले भन्नुभयो, ‘एमसीसी एउटा ठूलो सडकमा द्वन्द्व सिर्जना गरेर, हिंसा निम्त्याएर नेपाली नागरिकहरुको बीचमा एउटा असाध्यै पेचिलो लडाइँ सिर्जना गरेर विलम्व गरेर ल्याइयो । नाटक के देखिँदैछ भने सरकारमा पनि बस्ने, संसदमा पनि उपस्थित हुने, कोही बस्ने कोही उभिने, कोही नारा लगाउने, कोही मुसुमुसु हासिरहने, त्यस्तो नाटक पनि देखिएको छ । सडकमा एउटा, अमेरिकासँग एउटा, कार्यकर्तासँग एउटा, बैठकमा एउटा, रोचक दृश्य तपाईहरुले देखिरहनु भएको छ । नेकपा एमाले अहिलेको सभामुखको अन्याय, अत्याचार र विभेदका कारणले लामो समयदेखिस संसदीय कामकारबाहीमा विमुख भएर बसेको छ । त्यो हाम्रो बाध्यता भएको छ ।
हामीप्रति गरिएको अन्यायको कारणले गर्दा हामीले त्यसलाई प्रतिवाद गर्न हामी नाराबाजी र घेराउमा छौँ । त्यसकारण कुनै पनि संसदीय काम कारबाहीमा नेकपा एमालेलाई संलग्न हुने अवसर प्रदान गरिएको छैन । यी कुनै प्रक्रियामा हामी सामेल हुँदैनौँ । सडकमा हिंसा र जबरजस्ती जे गर्न खोजिएको छ नेकपा एमाले सिधासिधी बिरोध गर्दछौँ । हाम्रो माग पूरा नभएसम्म नेकपा एमाले कतै जाँदैन, हामी अवरोध गरिरहन्छौँ । हामीले सभामुख समक्ष नेकपा एमालेको तर्फबाट निर्वाचित सांसदलाई दलीय सहमतिको नभइ दलीय अनुमति बेगर बोल्न दिने कुरा दलीय मर्यादा बिरुद्धमा छ । हामीले दलीय सहमति बेगर किन बोल्न दिनुभयो भनेर आपत्ति प्रकट गरेका छौँ ।’
