एजेन्सी । कतारमा जारी फिफा विश्वकप नोभेम्बर २९ अर्थात् बुधबार सम्म ३६ खेल सम्पन्न भएका छन् । जसमा धेरै उतारचढाव र रोमाञ्चक प्रतिस्पर्धा देखिएको छ । ९ खेलको नतिजा बराबरीमा सकिएको छ ।
समूह चरणमा २४ टोलीले २–२ खेल खेलेका छन् । ८ टोलीका ३–३ खेल पनि सम्पन्न भएका छन् । जसमध्ये इक्वेडरका इनर भ्यालेन्सिया, नेदरल्याण्ड्सका कोडी गाक्पो, इङ्ल्यान्डका मार्कस रासफोर्ड र फ्रान्सका केलियन एमबाप्पे ३–३ गोल गर्दै गोल्डेन बुटको दौडमा शीर्ष स्थानमा छन् ।
यस्तै, अर्जेन्टिनाका लियोनल मेसी, इंग्ल्यान्डका बुकायो साका र ब्राजिलका रिचार्लिसनसहित ९ टोलीका ११ खेलाडी २–२ गोल गर्दै उनीहरुलाई पछ्याइरहेका छन् ।
डिसेम्बर ३ बाट नकआउट चरण सुरु हुनेछ । गोल्डेन बुटको दौडमा संलग्न गोक्पोको टोली नेदरल्याण्ड्स, रासफोर्डको टोली इङ्ल्यान्ड र एम्बाप्पेको टोली फ्रान्स नकआउट चरणमा पुगेका छन् । यस्तो अवस्थामा तीनै खेलाडीसँग नकआउट राउण्डमा गोल गर्दै गोल्डेन बुट जित्ने सम्भावना बढी हुनेछ । यदि उसको टोलीले जित्यो भने, उक्त खेलाडीले अर्को राउन्डमा पनि गोल गर्ने मौका पाउनेछ ।
यद्यपि, इनर भ्यालेन्सियाको टोली इक्वेडर समूह चरणको अन्तिम खेलमा सेनेगलसँग पराजित भएको थियो । समूह चरणका ३ खेलमा एक जित, एक हार र एक बराबरी खेलेको टोली प्रि क्वाटरफाइनलमा पुग्न सकेन । त्यसैले उनको टोलीले प्रतियोगितामा थप खेल खेल्ने छैन । यस्तो अवस्थामा उनको थप गोल गर्ने सबै सम्भावना समाप्त भएको छ ।
गोल्डेन बुट के हो ?
फिफा विश्वकपमा गोल्डेन बुट प्रतियोगितामा सबैभन्दा बढी गोल गर्ने खेलाडीलाई दिइन्छ । २०१८ को रुसमा खेलिएको प्रतियोगितामा इंग्ल्याण्डका कप्तान ह्यारी केनले गोल्डेन बुट पाएका थिए । उनले ६ खेलमा ६ गोल गरेका थिए । सन् १९८२ को प्रतियोगितापछि ‘गोल्डेन शु अवार्ड’ दिइएको थियो । तर, २०१० बाट यसको नाम गोल्डेन बुटमा परिवर्तन भयो ।
