सुनसरी, १२ मंसिर । नेकपा एमालेकी उम्मेदवार भगबती चौधरीले बर्जु गाउँपालिकाको ६ वटा वडाको मतगणना बाँकी रहँदा आफ्नो अग्रता कायमै राखेकी छिन् । मंसिर ४ गते सम्पन्न प्रतिनिधि सभा निर्वाचनमा नेपाली कांग्रेसका उम्मेदवार बिजयकुमार गच्छदारलाई करिब ४ हजार पाँच सयमै सिमित राख्दै चौधरीले अग्रता कायम राखेकी हुन् ।
पछिल्लो मत गणना अनुसार चौधरीले ३२ हजार ४ सय १७ मत प्राप्त गर्दा गच्छदार २७ हजार ६ सय ५६ मा रोकिएका छन् । अब बर्जु गाउँपालिकाको वडा नं. १ देखि ६ सम्म गणना गर्न बाँकी रहेको निर्वाचन अधिकृतको कार्यालय दुहवीले जनाएको छ ।
४ हजार ७ सय ६१ मतले चौधरी गच्छदार भन्दा अगाडी छिन् । अहिलेसम्म राष्ट्रिय स्वतन्त्र पार्टीका उम्मेदवार कमलबाबु मैनाली ६ हजार १ सय ५६ मत सहित तेश्रो स्थानमा छन् ।
निर्वाचन अधिकृतको कार्यालयका अनुसार हालसम्म ७४ हजार ५२ मत गणना हुँदा ७० हजार १ सय २६ मत सदर भएको छ । ३ हजार ९ सय २६ मत बदर भएको कार्यालयले जनाएको छ । अब १८ हजार ७ सय १४ मत गणना हुन बाँकी रहेको छ ।
