काठमाडौँ । नेकपा (एकीकृत समाजवादी) की सचिव रामकुमारी झाँक्रीले नेकपा (एमाले) का उपाध्यक्ष विष्णु पौडेल र नेता खिमलाल भट्टराइसँग बीचमा बसेर फोटो खिचाउँदै सामाजिक सञ्जाल फेसबुकमा पोस्ट गरेकी छन् ।
काठमाडौँ फर्किने क्रममा भैरहवा अन्तर्राष्ट्रिय विमानस्थलमा जम्काभेट भएपछि उनले दुवै नेतासँग खिचेको फोटो फेसबुकमा साझा गर्दै ‘तस्बिरमा सन्देश छ’ भनेर लेखेकी छन् ।
यद्यपि उनले तस्बिरले कस्तो सन्देश दिन खोजेको हो भन्नेबारे केही खुलाएकी छैनन् । गुल्मी निर्वाचन क्षेत्र नं २ मा प्रतिनिधिसभा सदस्य पदमा उनी एमालेका सचिव गोकर्ण विष्टसँग पराजित भएकी थिइन् ।
एमाले विभाजन हुँदा झाँक्री एमाले छाडेर माधव नेपाल नेतृत्वको एकीकृत समाजवादीतिर लागेकी थिइन् । अर्थपूर्णरुपमा लेखेको सन्देशले उनले पुनः एमालेतिर फर्किन लागेको छनक दिएकी हुन् की भन्ने अनुमान गरिएको छ ।
