काठमाडौँ। प्रधानमन्त्री एवं नेपाली कांग्रेसका सभापति शेरबहादुर देउवाले नेकपा (एमाले)का अध्यक्ष केपी शर्मा ओलीलाई अतिक्रमित भूमि फिर्ता ल्याउन दार्चुलामा नभई भारतसँग बोल्न सक्नुपर्ने जवाफ दिनुभएको छ ।
दार्चुलामा बुधबार आयोजित गठबन्धनको चुनावीसभालाई सम्बोधन गर्दै प्रधानमन्त्री देउवाले भन्नुभयो, “ओलीजीले यहाँ आएर बोलेर हुँदैन । भारतसँग कुरा गर्नसक्नुपर्छ।”
सीमा समस्या समाधानका लागि आफूहरु प्रतिबद्ध रहेको भन्दै उहाँले भूमि फिर्ता लिनका लागि भारतसँग कुरा गर्न र सम्पूर्ण एक भएर वार्ता गर्नुपर्ने बताउनुभयो ।
उहाँले कालापानी, लिपुलेक र लिम्पियाधुरा नेपालको हो भनेर संसदले बहुमतले पारित गरेको बताउनुभयो ।
