एजेन्सी । सर्वाधिक पाँच पटकको च्याम्पियन ब्राजिलले फिफा विश्वकप २०२२ कतारका लागि २६ सदस्यीय अन्तिम टोलीको घोषणा गरेको छ ।
ब्राजिलका प्रशिक्षक टिटेले अन्तिम टोली सार्वजनिक गरेका हुन् । ब्राजिलले गोलरक्षकमा एडरसन मोराएस, एलिसन बेकर र वेभर्टनलाई समेटेको छ । यस्तै, डिफेन्समा अनुभवी थियागो सिल्भा र ड्यानी आल्भेससँगै मार्किन्हस, ड्यानीलो, एडर मिलिसाओ, एलेक्स टेलेस, एलेक्स सान्ड्रो र ब्रेमर रहेका छन् ।
यसैगरी, मिडफिल्डमा क्यासेमिरो र फाबिन्होसँगै लुकास पाक्वेटा, फ्रेड, ब्रुनो गुइमराएस र एभर्टन रिबिएरो रहेका छन् भने आक्रमणमा नेयमार, रिचार्लीसन, भिनीसियस जुनियर, एन्टोनि, राफिन्हा, रोड्रीगो, पेड्रो, ग्याब्रिएल जेसस र ग्याब्रिएल मार्टिनेली रहेका छन् । यता, लिभरपुलका रोबर्टो फिर्मिनोले भने टोलीमा स्थान बनाउन सकेनन् ।
फिफा विश्वकप २०२२ मा ब्राजिल समूह जी मा रहेको छ । ब्राजिलको समूहमा सर्बिया, स्विटजरल्यान्ड र क्यामरुन रहेका छन् । ब्राजिलले मङ्सिर ८ गते मध्यराती १२ः४५ बजे सर्बियाविरुद्ध खेल्दै विश्वकपको सुरुवात गर्नेछ ।
