एजेन्सी । पाकिस्तान अष्ट्रेलियामा जारी टी–२० विश्वकपको सेमिफाइनलमा प्रवेश गरेको छ ।
एडिलेटमा आइतबार भएको खेलमा बंगलादेशलाई ५ विकेटले हराउँदै पाकिस्तानले सेमिफाइनलमा स्थान बनाएको हो । बंगलादेशले दिएको १ सय २८ रनको लक्ष्य पाकिस्तानले १८ ओभर १ बलमा (११ बल बाँकी छँदै) ५ विकेट गुमाएर पूरा गर्यो ।
पाकिस्तानको जितमा मोहमद रिजवानले ३२ रन जोड्दा मोहमद हरिसले ३१ रन बनाए । यस्तै, कप्तान बाबर आजमले २५ तथा शान मासुद २४ रनमा अविजित रहे ।
बंगलादेशका शकिब अल हसन, मुस्ताफिजुर रहमान, एबाडोट होसेन र नसुम अहमेदले १–१ विकेट लिए । त्यसअघि पहिले ब्याटिङ गरेको बंगलादेशले २० ओभरमा ८ विकेट गुमाएर १ सय २७ रन जोड्यो ।
बंगलादेशका लागि नाजमुल होसेन शान्टोले ५४ रनको अर्धशतकीय इनिङ खेले । यस्तै, आफिफ होसेन २४ रनमा अविजित रहँदा सौम्य सरकारले २० रन जोडे ।
पाकिस्तानका शाहिन अफ्रिदीले ४ विकेट लिए । यस्तै, शादब खानले २ तथा हरि राउफ र इफ्तिखार अहमदे एक–एक विकेट लिए ।
जितसँगै पाकिस्तानले समूह २ बाट शीर्षस्थानमा रहँदै सेमिफाइनलमा स्थान बनाएको हो । बंगलादेश ४ अंक जोडेर बाहिरिएको छ । यस समूहबाट भारतले पनि सेमिफाइनलमा स्थान बनाएको छ भने दक्षिण अफ्रिका पनि बाहिरिएको छ ।
