काठमाडौं । प्रधानमन्त्री शेरबहादुर देउवाले अझै एक हप्ता मन्त्रिपरिषद् विस्तार नगर्ने भएका छन् । प्रधानमन्त्री देउवाले माधव नेपाल समूहलाई सहभागी गराएरमात्रै मन्त्रिपरिषद् विस्तार गर्ने तयारी गरेका हुन् ।
प्रधानमन्त्री देउवा माधव पक्षलाई पनि सहभागी गराएरमात्रै सरकारलाई पूर्णता दिने पक्षमा पुगेका हुन् । देउवाले नेपाललाई फोन गरेर सरकारमा सहभागी हुनको लागि आग्रह गर्दै एक हप्तासम्म कुर्न सक्ने जानकारी गराएका हुन् ।
प्रधानमन्त्री देउवानिकट उच्च स्रोतकाअनुसार आज विहानमात्रै देउवाले नेता नेपाललाई फोन गरेका छन् । नेपाल पक्षले पार्टी एकतामै जोड दिने निश्कर्ष निकालेपनि देउवा भने विश्वासको मत दिएकाले गुन तिर्ने तयारीमा जुटेका हुन् ।
नेपाल पक्षका अधिकांश केन्द्रीय सदस्यहरुले तत्काल पार्टी विभाजनमा जान नहुने र एकताकै पक्षमा जोड दिनुपर्ने धारणा राखेका थिए । प्रधानमन्त्री देउवालाई विश्वासको मत दिएका केहि नेताहरुले भने कुनैपनि हालतमा सरकारमा जानुपर्ने पक्षमा उभिएका छन् ।
आज विहान प्रधानमन्त्री देउवाले नेता नेपालसँग फोनवार्ता गरेरमा नेता नेपालले आफूले नेताहरुसँग सल्लाह गरेर मात्रै जवाफ दिने भनेका थिए ।
