काठमाडौँ । प्रहरीले काठमाडौँको एक लजको कोठाभित्र गोप्य रूपमा भिडियो रेकर्ड गरेको आरोपमा एक जनालाई पक्राउ गरेको छ ।
काठमाडौँ महानगरपालिका–३ बाँसबारीस्थित बाँसबारी रेष्ट्रो क्याफे एन्ड लजका म्यानेजर काठमाडौं चन्द्रागिरि–१५ का ४२ वर्षीय मुकेश मालीलाई प्रहरीले पक्राउ गरेको हो ।
बुधबार दिउँसो उक्त लजमा बस्न आउने पाहुनाको गोप्य रूपमा भिडियो रेकर्ड गरेको भन्ने सूचना प्रहरीले पाएको थियो । उक्त सूचनापछि महाराजगन्जबाट खटिएको टोलीले चेक गर्दा उनले गोप्य भिडियो खिचेको खुल्नमा आएको हो । उनले हरेक कोठाको ढोकामा प्वाल बनाएको प्रहरीले जनाएको छ ।
प्रहरीले उनको साथमा रहेको आइफोन १२ प्रो म्याक्स पनि बरामद गरेको छ ।
उनीमाथि मुलुकी अपराध संहिता २०७४ को परिच्छेद–५ को ‘सार्वजनिक हित, स्वास्थ्य, सुरक्षा, सुविधा र नैतिकता विरुद्धका कसूर’ अन्तर्गत दफा ११८ ‘अभद्र व्यवहार गर्न नहुने’ मुद्दामा जिल्ला प्रशासन कार्यालय, काठमाडौंबाट ५ दिनको म्याद थप गरी प्रहरी वृत्त महाराजगञ्जबाट थप अनुसन्धान भईरहेको प्रहरीले जनाएको छ ।
