एजेन्सी । भारतका पूर्व अलराउन्डर रोजर बिन्नी भारतीय क्रिकेट कन्ट्रोल बोर्ड (बीसीसीआई) को नयाँ अध्यक्षमा निर्वाचित भएका छन् ।
उनी बीसीसीआईका ३६ औं अध्यक्ष हुन् । रोजरले सौरभ गांगुलीबाट जिम्मेवारी लिनेछन् । गांगुलीले २०१९ देखि २०२२ सम्म यो पद सम्हालेका थिए ।
बीसीसीआईको वार्षिक साधारण सभा (एजीएम)ले यस्तो निर्णय गरेको हो । मंगलबार रोजर बिन्नीको नामको औपचारिक घोषणा हुनसक्ने बताइएको छ ।
रोजर भारतका पहिलो एंग्लो–इन्डियन क्रिकेटर हुन् । उनी १९८३ को विश्वकप जित्ने भारतीय टोलीका महत्वपूर्ण सदस्य थिए । विश्वकपमा उनको योगदान निकै महत्वपूर्ण थियो । कपिल देवको कप्तानीमा भारतीय टोलीले उत्कृष्ट प्रदर्शन गर्दै पहिलो पटक विश्वकप ट्रफी जितेको थियो । यस प्रतियोगितामा रोजर बिन्नी सर्वाधिक विकेट लिने खेलाडी बनेका थिए ।
यस बाहेक बिन्नीको नेतृत्वमा टीम इन्डियाले अर्को विश्वकप जितेको थियो । रोजर बिन्नी सन् २००० मा भारतीय अन्डर–१९ टोलीका प्रशिक्षक पनि थिए । उनको निगरानीमा टीम इन्डियाले अन्डर– १९ विश्वकप जितेको थियो ।
रोजर बिन्नीले सन् १९७९ मा अन्तर्राष्ट्रिय डेब्यु गरेका थिए । उनले पाकिस्तानविरुद्ध बैंगलोरमा पहिलो टेस्ट खेलेका थिए । यसपछि सन् १९८० मा बिन्नीले अस्ट्रेलियाविरुद्ध एकदिवसीय क्रिकेटमा डेब्यू गरेका थिए । रोजर बिन्नीको करियर १९७९ देखि १९८७ सम्म चलेको थियो । यस अवधिमा उनले भारतका लागि २७ टेस्ट र ७२ ओडीआई खेलेका थिए । बिन्नीले टेष्टमा ४७ र एकदिवसीयमा ७७ विकेट लिएका छन् । यसबाहेक बिन्नीले टेस्टमा ८३० रन र एकदिवसीयमा ६२९ रन बनाएका छन् ।
