एजेन्सी । स्पेनिस ला लिगा फुटबल अन्तर्गत सिजनको पहिलो ‘एल क्लासिको’ मा रियल मड्रिडले क्याटलान क्लब बार्सिलोनालाई पराजित गरेको छ ।
आइतबार राति रियलले घरेलु मैदान सान्टियागो बर्नबेउमा बार्सिलोनाविरुद्ध ३–१ गोलको जित निकालेको हो । रियललाई जित दिलाउन करिम बेन्जेमा, फेडेरिको भाल्भर्डे र रोड्रिगोले एक–एक गोल गरे भने बार्सिलोनाका फेरान टोरेसले एक गोल फर्काए ।
खेलको १२औं मिनेटमा बेन्जेमाले गोल गर्दै रियललाई सुरुवाती अग्रता दिलाएका थिए । उनले टोनी क्रुस र भिनिसियस जुनियरको कम्बिनेसनमा मिलेको पासलाई सदुपयोग गर्दै गोल गरे ।
३५औं मिनेटमा फेडे भाल्भर्डेले गोल गर्दै रियलको अग्रता दोब्बर पारे ।उनलाई फर्लान्ड मेन्डीले पास उपलब्ध गराएका थिए । यता, ८३औं मिनेटमा वैकल्पिक खेलाडी फेरान टोरेसले गोल गर्दै रियललाई २–१ को स्थितिमा ल्याए । ६०औं मिनेटमा राफिन्हाको स्थानमा मैदान छिरेका टोरेसले रोबर्ट लेवान्डोस्कीको पासमा गोल गरेका हुन् ।
यस्तै, इन्ज्युरी समयमा वैकल्पिक खेलाडी रोड्रिगोले पेनाल्टीमा गोल गर्दै रियलको जित पक्का गरे । ८५औं मिनेटमा भिनिसियस जुनियरको स्थानमा मैदान छिरेका रोड्रिगोलाई एरिक गार्सियले फउल गरेपछि रेफ्रील भिएआरको सहायतामा रियलले पेनाल्टी पाएको थियो । जसलाई उनले खेर जान दिएनन् ।
जितसँगै रियलले शीर्षस्थानमा बार्सिलोनासँग स्पष्ट ३ अंकको अग्रता लिएको छ । अपराजित रहेको रियलले ९ खेलबाट २५ अंक जोडेको छ । अर्कोतर्फ पहिलो हार ब्यहोरेको बार्सिलोना २२ अंकसहित दोस्रो स्थानमा रहेको छ ।
