काठमाडौं । राष्ट्रिय वाणिज्य बैंक लिमिटेडले क्रेडिट कार्ड सेवाको शुभारम्भ गरेको छ । बैंकले मंगलबारदेखी क्रेडिट कार्ड सेवाको शुभारम्भ गरेको हो । बैंक सञ्चालक समितिका अध्यक्ष रामशरण पुडासैनीले बैंकका ग्राहक एवं एसियन लाइफ इन्स्योरेन्स कम्पनीका अध्यक्ष दिपककुमार श्रेष्ठलाई एक कार्यक्रमका बीच क्रेडिट कार्ड हस्तान्तरण गर्दै सेवाको शुभारम्भ गरेका हुन् ।
बैंकको हाल ७७ जिल्लामा दुई सय ४७ वटा शाखा कार्यालय, दुई सय नौवटा एटीएम र ९८ वटा शाखारहित बैंकिङ रहेको छ । क्रेडिट कार्डको शुभारम्भ पछि पूर्ण डिजिटल बैंकिङतर्फ बैंक अगाडि बढिरहेकोे बैंंकका प्रमुख कार्यकारी अधिकृत किरणकुमार श्रेष्ठले बताए । नेपाल, भारत र भुटानमा चल्ने यो सेवा बैंकका सबै शाखा कार्यालयबाट माग गर्न सकिने पनि अधिकृत श्रेष्ठले बताए ।
यता प्रतिस्पर्धी बजारमा सस्तो ब्याजदरमा दिइने क्रेडिट कार्ड ग्राहकको आयस्रोत एवं भुक्तानी क्षमताको आधारमा ग्राहकलाई २० हजारदेखि पाँच लाख रुपैयाँसम्मको क्रेडिट लिमिट दिन सकिने उपकार्यकारी अधिकृत देवेशप्रसाद लोहनीले बताए ।
