जनकपुरधाम । मधेश प्रदेशका मुख्यमन्त्री लालबाबु राउतले नेपाली कांग्रेसका मन्त्रीहरुलाई हटाउने तयारी गरेका छन् ।
प्रधानमन्त्री शेरबहादुर देउवाले संघीय मन्त्रिपरिषदबाट जसपाका मन्त्रीलाई बर्खास्त गरेपछि राउतले पनि प्रदेशको मन्त्रिपरिषदबाट कांग्रेसका मन्त्रीलाई हटाउन लागेका हुन् ।
कांग्रेसबाट मधेश प्रदेश सरकारमा खानेपानी तथा उर्जा विकासमन्त्री ओमप्रकाश शर्मा, महिला, बालबालिका, युवा तथा खेलकुदमन्त्री वीरेन्द्रप्रसाद सिंह र भौतिक पूर्वाधार विकासमन्त्री रामसरोज यादव रहेका छन् । उनीहरुलाई मुख्यमन्त्री राउतले राजीनामा दिन अनुरोध गरेका छन् ।
आजै राजीनामा नदिए उनीहरुलाई पदमुक्त गर्ने मुख्यमन्त्री राउतको तयारी रहेको बताईएको छ । मुख्यमन्त्री राउतले नेकपा माओवादी केन्द्र र एकीकृत समाजवादीका मन्त्रीहरुलाई भने राजीनामा दिन भनेका छैनन् ।
