काठमाडौँ । संसदीय निर्वाचनमा सत्ता गठबन्धन त्यागेर नेकपा (एमाले) सँग सहकार्य गरेको जनता समाजवादी पार्टी (जसपा) बाट संघीय सरकारमा मन्त्री भएकाहरुलाई राजीनामा नदिए आजै बर्खास्त गरिने भएको छ ।
प्रधानमन्त्री निवास बालुवाटारमा आज गठबन्धनका शीर्ष नेताहरुसँगको परामर्शपछि जसपाका मन्त्रीहरुसँग राजीनामा मागिएको र यदि उनीहरुले राजीनामा नदिए प्रधानमन्त्री शेरबहादुर देउवाले आजै बर्खास्त गर्ने हुनुभएको छ ।
जसपाबाट संघीय सरकारमा संघीय मामिला तथा सामान्य प्रशासनमन्त्री राजेन्द्र श्रेष्ठ, भौतिक पूर्वाधारमन्त्री मोहम्मद इस्तियाक राई, वन तथा वातवरणमन्त्री प्रदीप यादव र कृषि तथा पशुपक्षीमन्त्री मृगेन्द्रकुमार सिंह रहनुभएको छ ।
सत्ता गठबन्धन छाडेर एमालेसँग चुनावी तालमेल गरेपछि जसपाका मन्त्रीहरुलाई सरकारबाट हटाउन गठबन्धनकै दलहरुबाट दबाब छ । यद्यपि जसपाका सहअध्यक्ष एवं संघीय मामिला तथा सामान्य प्रशासनमन्त्री श्रेष्ठले एमालेसँग आंशिक चुनावी तालमेल भएको भन्दै आफूहरु पाँच दलीय सत्ता गठबन्धनमै रहेको बताएका छन् ।
