काठमाडौँ । आगामी मंसिर ४ गते हुने प्रतिनिधिसभा तथा प्रदेशसभा निर्वाचनमा नेकपा (एमाले) सँग सहकार्य गरेको जनता समाजवादी पार्टी (जसपा) बाट संघीय सरकारमा सामेल मन्त्रीहरुलाई हटाउने तयारी सुरु भएको छ ।
सत्ता गठबन्धनबीच निर्वाचनका लागि सिट बाँडफाँटमा असहमति राख्दै गठबन्धन त्यागेर जसपाले एमालेसँग सहकार्य गरेको छ ।
प्रधानमन्त्री शेरबहादुर देउवाले आज दिउँसो सत्ता गठबन्धनमा संलग्न दलका नेताहरुसँग छलफल गरी जसपाका मन्त्रीहरुलाई हटाउने तयारी गर्नुभएको छ । सत्ता गठबन्धनमा आबद्ध दलहरुले जसपाका नेताहरुलाई मन्त्रीबाट हटाउनुपर्ने बताएका छन् ।
जसपाबाट संघीय सरकारमा संघीय मामिला तथा सामान्य प्रशासनमन्त्री राजेन्द्र श्रेष्ठ, भौतिक पूर्वाधारमन्त्री मोहम्मद इस्तियाक राई, वन तथा वातवरणमन्त्री प्रदीप यादव र कृषि तथा पशुपक्षीमन्त्री मृगेन्द्रकुमार सिंह रहनुभएको छ ।
उहाँहरु निर्वाचनमा एमालेसँग सहकार्य गरे पनि सरकारबाट तत्काल राजीनामा नदिने मनस्थितिमा रहनुभएको बताइएको छ । पार्टीले पनि आफ्ना मन्त्रीलाई सरकारबाट हट्न केही भनेको छैन ।
प्रधानमन्त्री देउवाले उनीहरुलाई मन्त्रीबाट हटाए पनि नयाँ मन्त्री नियुक्त गर्न पाउनुहुने छैन । २०७८ जेठमा प्रतिनिधिसभा विघटनपछि तत्कालीन प्रधानमन्त्री केपी शर्मा ओलीले गरेको मन्त्रिपरिषद विस्तारलाई सर्वोच्च अदालतले बदर गरेको थियो ।
