काठमाडौँ । नेपाली कांग्रेसका प्रभावशाली नेता मीनेन्द्र रिजालको प्रतिनिधिसभाको प्रत्यक्षतर्फको टिकट खोसिएको छ । पार्टी सभापति एवं प्रधानमन्त्री शेरबहादुर देउवाले उनलाई टिकट दिन बन्चित गर्नुभएको छ ।
अघिल्लो प्रतिनिधिसभाको निर्वाचनमा पार्टी संकटमा परेको बेला रिजालले निर्वाचित हुनुभएको थियो । प्रतिनिधिसभामा पार्टीको उपस्थिति कमजोर भएको बेलामा पनि उहाँले प्रभावकारी भूमिका निर्वाह गर्नुभएको थियो ।
संसद्मा प्रतिपक्षीको आवाजलाई बुलन्द बनाउनुभएका रिजाल पार्टीको १२औँ महाधिवेशनमा शेखर कोइराला समूहबाट महामन्त्रीको उम्मेदवार भई पराजित हुनुभएको थियो ।
पार्टी सभापति देउवाले अघिल्लो निर्वाचनमा रिजाल निर्वाचत भएको क्षेत्रमा सुजाता कोइरालालाई टिकट दिनुभएको छ । सुजाताले पार्टी महाधिवेशनमा कोइराला समूह छाडेर देउवालाई साथ दिनुभएको थियो । पछिल्लो समयमा रिजालले भने देउवाको कार्यशैलीप्रति विमति जनाउँदै आउनुभएको थियो ।
२०७४ को प्रतिनिधिसभाको प्रत्यक्षतर्फको निर्वाचनमा वाम गठबन्धनका उम्मेदवारलाई रिजालले पराजित गर्नुभएको थियो । नेपाली कांग्रेसले सो निर्वाचनमा प्रत्यक्षतर्फ २३ सिट जितेको थियो । कांग्रेसका केही नेताहरुले पार्टी सभापति देउवाले रिजालमाथि प्रतिशोध साँधेको बताएका छन् ।
पार्टी महामन्त्रीमा पराजित रिजाललाई देउवाले केन्द्रीय सदस्यमा समेत मनोनित गर्नुभएको थिएन । सो महाधिवेशनमा पराजित अधिकांश नेताहरुलाई उहाँले केन्द्रीय सदस्यमा मनोनित गर्नुभएको थियो । महामन्त्रीमा पराजित भएपछि रिजालले नैतिकताको कारण देखाउँदै रक्षामन्त्रीबाट राजीनामा दिनुभएको थियो ।
मोरङमा बलियो मानिएका रिजालले केही समयअघि नेकपा ९एमाले० अध्यक्ष केपी शर्मा ओलीसँग समेत छलफल गर्नुभएको थियो ।
