काठमाडौँ । निर्वाचन आयोगले आगामी मंसिर ४ गते हुने प्रतिनिधिसभा तथा प्रदेशसभा सदस्य निर्वाचनका लागि पहिलो हुने निर्वाचित हुने निर्वाचन प्रणालीतर्फको कार्यक्रम प्रकाशित गरेको छ ।
सोअन्तर्गत यही असोज २३ गते बिहान १० बजेदेखि बेलुका ५ बजेसम्म निर्वाचन अधिकृतको कार्यालयमा गई उम्मेदवारले मनोनयन दर्ता गर्नुपर्ने छ । सोही दिन बेलुका ५ बजेदेखि ७ बजेसम्ममा निर्वाचन अधिकृतको कार्यालयले मनोनयन पत्र दर्ता भएको उम्मेदवारको सूची प्रकाशन गर्नेछ ।
असोज २४ गते बिहान १० बजेदेखि दिउँसो ३ बजेसम्म उम्मेदवारको विरोधमा उजुरी दिन सकिने छ भने असोज २४ र २५ गते दिउँसो ३ बजेदेखि बेलुका ५ बजेसम्म मनोनयन पत्र र उजुरीउपर जाँचबुझ गरी कार्यालयले निर्णय लिनेछ ।
आयोगको कार्यक्रमअनुसार असोज २५ गते बेलुका ५ बजेदेखि ७ बजेसम्म उम्मेदवारको नामावली प्रकाशन हुनेछ भने उम्मेदवारलाई आफ्नो नाम फिर्ता लिने समय असोज २६ गते बिहान १० बजेदेखि दिउँसो १ बजेसम्म निर्धारण गरिएको छ ।
निर्वाचन अधिकृतको कार्यालयले असोज २६ गते दिउँसो १ बजेदेखि ३ बजेसम्म उम्मेदवारको अन्तिम नामावली प्रकाशन गर्नेछ भने सोही दिन दिउँसो ४ बजेदेखि बेलुका ७ बजेसम्म उम्मेदवारलाई निर्वाचन चिह्न प्रदान गर्नेछ ।
मंसिर ४ गते बिहान ७ बजेदेखि बेलुका ५ बजेसम्म सम्बन्धित मतदान केन्द्रमा मतदान हुनेछ ।
