एजेन्सी । इंग्लिस प्रिमियर लिग फुटबल अन्तर्गत आर्सनलले सहज जित निकालेको छ । शनिबार साँझ सम्पन्न खेलमा आर्सनलले टोटेनहमलाई ३-१ गोलले पराजित गरेको हो ।
आर्सनललाई जित दिलाउन घरेलु मैदानमा थोमस पार्टे, गाब्रियल जेसस र ग्रानिट जाकाले गोल गरे । टोटेनहमका लागि ह्यारी केनले एक गोल फर्काए ।
खेलको २० औं मिनेटमा पार्टेले गोल गर्दै आर्सनललाई सुरुवाती अग्रता दिलाए । बुकायो साकाले उपलब्ध गराएको पासमा पार्टेले डि-बक्स बाहिरबाट वान टचमा उत्कृष्ट गोल गरे ।
यता ३१ औं मिनेटमा ह्यारी केनले पेनाल्टीमार्फत गोल गर्दै खेललाई बराबरीमा ल्याए । ४९ औं मिनेटमा जेससले गोल गर्दै आर्सनललाई २-१ को स्थितीमा लगे । बुकायो साकाले प्रहार गरेको रिबाउन्ड बलमा जेससले गोल गरेका हुन् ।
यस्तै ६७ औं मिनेटमा जाकाले उत्कृष्ट गोल गर्दै आर्सनलको जित पक्का गरे । ६२ औं मिनेटमा एमर्सन रोयलले रातो कार्ड खाँदै मैदानबाट बाहिरिएपछि टोटेनहम १० खेलाडीमा समेटिएको थियने ।
उनले मार्टिनेलीमाथि फउल गरेपछि रेफ्रिले सिधै रातो कार्ड देखाएका थिए । जितसँगै आर्सनलले ८ खेलबाट २१ अंकसहित लिगको शीर्षस्थानमा कायम छ । पराजित टोटेनहम समान खेलबाट १७ अंकसहित तेस्रो स्थानमा छ ।
