काठमाडौँ । निर्वाचन आयोगले निर्वाचनसम्बन्धी समाचारलाई सही ढंगले तत्काल प्रवाह गरिदिन आमसञ्चार माध्यमलाई आग्रह गरेको छ ।
आयोगले शुक्रबार आयोजना गरेको पत्रकार सम्मेलनमा प्रमुख निर्वाचन आयुक्त दिनेशकुमार थपलियाले स्वतन्त्र, निष्पक्ष र भयरहित निर्वाचन गर्न आमसञ्चार माध्यमको भूमिका अत्यन्त महत्वपूर्ण छ भन्दै सञ्चारमाध्यमबाट सहयोग नभएको भए निर्वाचन सम्पन्न गर्न सायदै सकिने बताउनुभयो ।
विशेषगरेर निर्वाचन आचारसंहिताका सन्दर्भमा राजनीतिक विज्ञापन भएको छ कि छैन, निर्वाचनसम्बन्धी सामग्री/समाचार के कसरी प्रकाशन भइरहेका छन् भन्नेबारे आयोगले पाँच जना विज्ञ राखेर अनुगमन गरिरहेको उहाँले जानकारी दिनुभयो ।
यद्यपि उहाँले निर्वाचनसम्बन्धी समाचारलाई लिएर आयोगले कुनै पनि सञ्चार माध्यमलाई कुनै पनि किसिमको स्पष्टीकरण नसोध्ने र सोध्न पनि नमिल्ने उल्लेख गर्नुभयो । पत्रकार आचारसंहिताअन्तर्गत स्पष्टीकरण सोध्ने काम प्रेस काउन्सिलको रहेको उहाँको भनाइ थियो ।
निर्वाचनसम्बन्धमा प्रेस काउन्सिलले आन्तरिक आचारसंहिता बनाउन सक्नेछ भन्ने व्यवस्था रहेको उल्लेख गर्दै आचारसंहितालाई ध्यानमा राखेर सञ्चार माध्यमले स्वमूल्यांकन गरिदिए पुग्ने प्रमुख निर्वाचन आयुक्त थपलियाले बताउनुभयो ।
उहाँले भन्नुभयो, “पत्रकार आचारसंहिता, २०७३ का केही प्रावधान यो निर्वाचनबाटै प्रयोग गरौँ भन्न्ने आयोगको आग्रह र सुझाव छ ।”
उहाँले सबै उम्मेदवारलाई समान पहुँच दिन र नियमित प्रक्रियाअन्तर्गत निर्वाचनसम्बन्धी सामग्रीलाई समावेश गरिदिन अनुरोध गर्नुभयो ।
