काठमाडौं । नेकपा एमालेमा आगामी चुनावमा उम्मेदवार चयनको अधिकार अध्यक्ष केपी शर्मा ओलीलाई दिएको छ । ओलीको निवास बालकोटमा बिहीबार मध्यरातसम्म चलेको सचिवालय बैठकले बैठकले अध्यक्ष ओलीलाई सो जिम्मेवारी दिइएको हो ।
६ घण्टा बढी चलेको बैठकमा उम्मेदवारबारे ठोस निर्णय भने नभएको एक नेताले बताए । अन्य दलसँग तालमेलको कुरा टुंगिन बाँकी रहेकाले पनि थप छलफल गरेर मात्रै उम्मेदवारबारे निर्णय लिन नेताहरु सहमत भएका छन् ।
एमालेको जिल्ला र प्रदेशबाट ५६ प्रतिनिधिसभा सदस्य निर्वाचन क्षेत्रको उम्मेदवारमा एकल सिफारिस भएको छ । बाँकी निर्वाचन क्षेत्रमा एक भन्दा बढी आकांक्षीको नाम सिफारिस भएर आएको छ ।
बैठकले एकल सिफारिस भएर आएका नेताहरुबारे पनि निर्णय गरेको छैन । एकल सिफारिस भएर आएका नाममा पनि कुनै विवाद भए सम्बन्धित कमिटीका नेताहरुसँग परामर्श लिएर निर्णय लिने जिम्मा पनि अध्यक्ष ओलीलाई दिइएको छ ।
एमाले बैठकमा प्रतिनिधिसभाका ११० र प्रदेशसभाका २२० निर्वाचन क्षेत्रकै बारेमा छलफल भएको थियो । यद्यपि, समानुपातिक तर्फको बन्दसूचीबारे भने बैठकमा कुरा उठेन ।
एमालेले समानुपातिक तर्फको बन्दसूचीलाई अन्तिम रुप दिने अधिकार अध्यक्ष ओलीलाई दिइसकेको छ ।
