काठमाडौँ । नेपाली कांग्रेस संस्थापनइतरले काठमाडौँको बत्तीसपुतलीस्थित अनुपम फुडल्यान्डमा चियापान कार्यक्रमको आयोजना गरेको छ ।
कार्यक्रममा केन्द्रीय सदस्य शेखर कोइराला, उपसभापति धनराज गुरुङ, महामन्त्री गगन थापालगायतका शीर्ष नेता उपस्थित छन् । साथै पूर्वपदाधिकारी, केन्द्रीय सदस्य, जिल्ला सभापतिहरू पनि चियापान कार्यक्रममा पुगेका छन् ।
शेखर कोइराला समूहले पार्टीलाई खबरदारी गर्न पार्टी केन्द्रीय कार्यालय सानेपामा दिएको धर्नामा सहभागी नभएका नेताहरु पनि चियापान कार्यक्रममा सहभागी भएका छन् । चियापान कार्यक्रमलाई पनि शेखर समूहले खबरदारीकै निरन्तरता भनेको छ ।
चियापानमा सहभागी अधिकांश नेता कार्यकर्ताले आसन्न चुनावमा उम्मेदवार बन्नबाट वञ्चित भएको भन्दै गुनासो पोखेका छन् । समानुपातिकको बन्दसूचीमा पनि आफ्नो नाम नपरेको साथै प्रत्यक्षमा पनि सम्भावना कमजोर हुँदै गएको भन्दै पहल गरिदिन शेखर, गगन र धनराजसमक्ष उनीहरुले आग्रह गरेका छन् ।
बुधबार विद्रोही समूहले समान अवसर र समान न्यायका लागि पार्टी केन्द्रीय कार्यालय सानेपा धर्ना दिएको थियो ।
आगामी मंसिर ४ गते हुने प्रतिनिधिसभा सदस्य निर्वाचन प्रयोजनका लागि समानुपातिक उम्मेदवार चयनमा पार्टी सभापति एवं प्रधानमन्त्री देउवाले एकलौटी गर्ने प्रयास गरेको भन्दै शेखर पक्षले विरोध गर्दै आएको छ ।
विद्रोही पक्षले समानुपातिक सूचीमा नाम सच्याउन माग गर्दै आएको छ । विद्रोही पक्षले समानुपातिक सूचीमा आफ्नो पक्षलाई ४० प्रतिशत सिट दिनुपर्ने माग गरेको छ ।
संस्थापन पक्षले आफूहरुको मागलाई बेवास्ता गरिरहे र समानुपातिक सूची नसच्याए असोज १४ गतेदेखि पार्टी नेतृत्वप्रति कठोर निर्णय लिने नेता केसीले जानकारी दिनुभएको छ ।
