काठमाडौं । काठमाडौं महानगरपालिकाका प्रमुख बालेन्द्र शाह (बालेन)ले डेंगु नियन्त्रणका लागि महानगरले विशेष कार्यक्रम चलाइरहेको बताएका छन् ।
मेयर शाहका अनुसार वडाको आकार अनुसार ठूला वडाहरूमा १ लाख, मध्यमका लागि ७५ हजार तथा साना वडाहरूमा ५० हजारका दरले बजेट छुट्याइएको छ ।
उनले अहिले डेंगुको प्रकोप बढिहरेको उल्लेख गर्दै जाडोमा डेंगु आफैं हट्छ भनेर जाडो नपर्खिन आग्रह समेत गरेका छन् ।
उनका अनुसार प्रत्येक विद्यालयमा विद्यालय नर्स र स्वास्थ्यकर्मीबाट विद्यार्थीहरुलाई डेंगुबारे सचेत गराउने कार्यक्रमको थालनी गरिएको, ब्रोसर ब्यानर छपाइ गरी घरदैलो कार्यक्रममा वितरण गरिएको, लामखुट्टेको बासस्थान र लार्भा खोजी गरि नष्ट गर्ने अभियान ३२ वटै वडामा सञ्चालन गरिएको छ ।
यस्तै, बुधबारदेखि प्रयोगशाला भएका क्लिनिकमा आरडीटी परीक्षण थालिने उनले जनाएका छन् ।
