काठमाडौँ । नेपालसँग जोडिएका चिनियाँ भन्सार नाकाहरुमा आएका सामग्रीहरु अर्को साताबाट नेपाल पठाउने तयारी भएको छ । कोभिड–१९ को संक्रमणको कारण देखाउँदै नेपालसँग जोडिएका भन्सार नाकाहरु चीनले बन्द गरेपछि ती सामान नाकाहरुमै अड्किएर बसेका थिए ।
बेइजिङस्थित नेपाली दूतावासकाे श्राेत अनुसार अब ती सामान विस्तारै अर्को साताबाट नेपाल पठाउने तयारी भएको छ । यद्यपि चीनले नेपालसँग जोडिएका आफ्ना भन्सार नाकाहरु तत्काल नखुलाउने स्पष्ट गरेको छ ।
चीनको बेइजिङ, इनर मंगोलिया, सिन्जियाङ, छन्दु र तिब्बतलगायत क्षेत्रमा कोरोना संक्रमण व्यापक देखिएको बताइएको छ । दूतावासका अनुसार चीनको आधाभन्दा बढी प्रान्तमा कोरोना संक्रमण फैलिएको छ ।
चीनले आफ्नै स्वशासित क्षेत्र तिब्बतमा समेत सामान निर्यात गरेको छैन । तिब्बतका विभिन्न सहरमा ८ अगस्टदेखि कोरोना सङ्क्रमणका कारण लकडाउन जारी छ ।
लकडाउनका कारण अहिले पनि नेपालसँग जोडिएका चिनियाँ भन्सार नाकाहरु केरुङमा २०० भन्दा बढी कन्टेनर रोकिएका छन् । त्यस्तै खासामा १००, मिम्बुमा ३०, सिगात्सेमा २५ कन्टेनर रोकिएको अवस्था छ ।
चीनले नाका खोल्न नमानेका कारण दशैँलाई लक्षित गरी ल्याइएका लत्ताकपडा पनि नाकामा थुनिएर रहेका थिए । चीनबाट आयात हुने स्याउ कुहिने अवस्थामा रहेको बताइएको छ ।
