दुबइः युएइको दुबइमा जारी एसिया टी२० क्रिकेट प्रतियोगिता अन्तरगत मंगलबार भएकाे खेलमा श्रीलंकाले भारतलाइ छ विकेटले पराजित गरेको छ । सुपर चारमा भएको यस खेलमा पराजयसँगै भारतको फाइनल पुग्ने संभावना लगभग समाप्त भएको छ ।
टस हारेर पहिले ब्याटिङको निम्तो पाएको भारतले निर्धारित २० ओभरमा ८ विकेट गुमाएर १७३ रन बनाएको थियो । भारतका लागि कप्तान रोहित शर्माले सर्वाधिक ७२ रन बनाए । ४१ बलको सामना गरेका उनले ५ चाैका र ४ छक्का प्रहार गरेका थिए ।
यस्तै, सूर्य कुमार यादवले ३४, हार्दिक पान्ड्या र ऋषभ पन्तले समान १७, १७ रन बनाएका थिए ।
एक सय ७४ रनको लक्ष पछ्याएको श्रीलंकाको शुरूवात निकै प्रभावशाली रहेको थियो । पहिलो विकेटका लागि ९७ रनको पारि खेले पनि त्यसपछि लगातार तीन विकेट गुमाएर श्रीलंका दबाबमा परेको थियो ।
श्रीलंकाका लागि दुबै प्रारम्भिक ब्याट्सम्यान पाथुम निस्सान्काले ५२ तथा बी मेन्डिसले ५७ रन बनाएका थिए । तर त्यसपछि के असालान्काले ०, एम गुनथिलकाले १ रन बनाएर बिदा भए । तर सनाका र राजपाक्षले खेललाइ रोमान्चक बनाउँदै श्रीलंकालाइ जित दिलाए । सनाकाले ३३ र राजपाक्षले २५ रन बनाएका थिए ।
समग्रमा श्रीलंकाले १९.४ ओभरमा निर्धारित लक्ष पुरा गरेको थियो ।
भारतीय स्पिनर युजबेन्द्र चहलले ३ र रबिचन्द्र अश्विनले १ विकेट लिएपछि श्रीलंका दबाबमा परेको थियो । तर अन्य बलरले साथ नदिँदा भारतले खेल गुमाएको थियो ।
सुपर चार अंक तालिका
श्रीलंका – २ खेल – ४ अंक
पाकिस्तान – १ खेल – २ अंक
भारत – २ खेल – ० अंक
अफगानिस्तान – १ खेल – ० अंक
बुधबारको खेल
पाकिस्तान vs अफगानिस्तान
