काठमाडौँ । राष्ट्रियसभाको आइतबार बसेको बैठकमा राष्ट्रपति विद्यादेवी भण्डारीले फिर्ता पठाउनुभएको नागरिकता विधेयकको सन्देश टेबुल भएको छ ।
बैठकमा राष्ट्रियसभाका सचिव राजेन्द्र फुयाँलले पुनर्विचारका लागि राष्ट्रपतिबाट फिर्ता भएको नागरिकता विधेयकका सम्बन्धमा प्रतिनिधिसभाबाट प्राप्त सन्देशबारे जानकारी गराउनुभयो ।
राष्ट्रियसभाको अबको बैठकमा फिर्ता भएको नागरिकता विधेयकबारे छलफल हुनसक्छ । राष्ट्रपतिले सन्देशसहित पुनर्विचारका लागि विधेयक फिर्ता गरेमा संघीय संसद्को दुवै सदनले सो विधेयकमा पुनर्विचार गरी संशोधनसहित वा हुबहु पारित गर्नुपर्छ ।
राष्ट्रपति भण्डारीले पुनर्विचारका लागि फिर्ता पठाउनुभएको नागरिकता विधेयकलाई प्रतिनिधिसभाले हुबहु पारित गरिसकेको छ । अब सो विधेयकलाई राष्ट्रियसभाले पनि पारित गर्नुपर्ने छ ।
राष्ट्रियसभाबाट पनि सो विधेयक हुबहु पारित भएको खण्डमा प्रमाणीकरणमा राष्ट्रपतिकहाँ पुगेको १५ दिनभित्र राष्ट्रपतिले प्रमाणीकरण गर्नुपर्ने संवैधानिक व्यवस्था छ । उहाँलाई दुवै सदनबाट पुनः पारित भएर आएको विधेयकलाई फेरि पुनर्विचार गर्नका लागि संसद्मै फिर्ता पठाउन सक्ने अधिकार छैन ।
