उदयपुर । उदयपुरको बेलका नगरपालिकाको विभिन्न स्थानमा सप्तकोशी नदीको बाढी प्रवेश गर्दा धेरै स्थानीय बासिन्दाहरू विस्थापित भएका छन् ।
बाढी पीडितहरु यतिबेला नगरको विभिन्न स्थानको विद्यालयमा राखिएको छ ।उनीहरुलाई खान, बस्न र अन्य उपभोग्य सामग्रीको व्यवस्था बिभिन्न संघ संस्थाहरुले गरिरहेका छन् ।
सोमबार र मङ्गलबार आएको सप्तकोशी नदीको बाढीले बेलकाको कोशी नदी तटीय क्षेत्रका सिसौलिया, डुम्रीबोट, सातपत्रे, एबिसी, श्रीलङ्का टापु, तपेस्वरी, करैया, भागलपुरसहितका स्थानका दुई हजार पाँच सय विस्थापित भएको नगरपालिकाले जनाएको छ ।
यसैबीच मानवीय र सामाजिक सेवाका क्षेत्रमा लामो समयदेखि क्रियाशील स्वयंसेवी संस्था भोलेन्टियर कर्प्स नेपाल (भिसिएन)ले बाढी पीडितलाई उनीहरुकै घरदैलोमा पुगेर राहत बाँडेको छ । बाढीका कारण धेरै स्थानीय बासिन्दाको घरबास नै उठिबास लागेको छ ।
भिसिएनले सामाजिक उत्तरदायित्वलाई महसुस गरी बाढी प्रभावित क्षेत्रमा राहतका कार्यलाई अघि बढाएको संस्थाका अध्यक्ष दीपक चापागाईले जानकारी दिनुभयो ।
तस्वीर- राधा मताङ्गी
