काठमाडौं । प्रतिनिधिसभा र प्रदेशसभाको निर्वाचन आगामी मंसिर ४ गते हुने भएको छ । मन्त्रिपरिषद्को भर्खरै बसेको बैठकले दुवै निर्वाचन एकै चरणमा मंसिर ४ गते गर्ने घोषणा गरेको हो ।
सत्ता गठबन्धनको बुधबार बसेको बैठकले मंसिर पहिलो साता चुनावको मिति घोषणा गर्न सरकारलाई सुझाव दिएको थियो । निर्वाचन आयोगले भने मंसिर २ गते देखि ५ गतेभित्र चुनाव गर्न सिफारिस गरेको थियो । यसअघि २०७४ सालमा प्रतिनिधिसभा र प्रदेशसभा निर्वाचन दुई चरणमा भएको थियो ।
निर्वाचनको घोषणासँगै वर्तमान सरकार काम चलाउ सरकारमा परिणत भएको छ । काम चलाउ सरकार भएपछि वर्तमान सरकारले नियमित दैनिक प्रशासनिक काम गर्न पाए पनि दीर्घकालसम्म असर पर्ने काम गर्न पाउँदैन । आफैन्ले चुनावको मिति घोषणा गरिसकेको अवस्थामा सरकारले निर्वाचन आचारसंहिता पालना गर्नुपर्छ ।
सरकारले निर्वाचनको घोषणा गरेपछि मतदाता नामावली संकलन कार्य रोक्का भएको छ भने सरकारी नियुक्ति, सरुवा बढुवा लगायतका कार्य भोलिदेखि बन्द हुने भएको छ ।
