काठमाडौं । साफ यू–२० च्याम्पियनसिप फुटबलमा भारत फाइनलमा प्रवेश गरेको छ । घरेलु टोली भारतले भुवनेश्वरस्थित कालिंगा स्टेडियममा मंगलबार राति सम्पन्न समूह चरणको अन्तिम खेलमा माल्दिभ्सलाई १–० गोलले हराउँदै फाइनलमा स्थान बनाएको हो । भारतको जितमा गुर्किरात सिंहले निर्णायक गोल गरे । उनले खेलको ९० औं मिनेटमा गोल गरे ।
भारतले अब उपाधिका लागि बंगलादेशसँग प्रतिस्पर्धा गर्नेछ । पाँच राष्ट्र सहभागी भएको च्याम्पियनसिपमा शीर्ष दुई टोली उपाधिका लागि भिड्ने भएका हुन् । अब उपाधिका लागि साउन २० गते भारत र बंगलादेश भिड्नेछन् ।
यसै खेलको नतिजाको प्रतिक्षमा रहेको नेपालले भने फाइनल खेल्न चुकेको छ । यदि भारत माल्दिभ्ससँग पराजित भएको खण्डमा नेपालले फाइनल खेल्ने थियो ।
