काठमाडौँ । नेकपा (एमाले) का अध्यक्ष केपी शर्मा ओलीले आगामी निर्वाचनबाट एमाले सरकारमा फर्कनुपर्ने बताउनुभएको छ । उहाँले त्यसका लागि तयारी गर्न कार्यकर्ताहरुलाई निर्देशन दिनुभएको छ ।
बुधबार बागमती प्रदेशस्तरीय भेला तथा प्रशिक्षण कार्यक्रममा काठमाडौँमा उहाँले देशको समृद्धि र विकासको लयलाई पुनः समात्न र अगाडि बढाउन आगामी निर्वाचनबाट एमालेको सरकार बन्नुपर्ने र ती उद्देश्य प्राप्त गर्न अगाडि बढ्नुपर्ने बताउनुभयो ।
अध्यक्ष ओलीले आगामी मंसिरमा संघीय र प्रदेशसभा निर्वाचन हुनै पर्ने भन्दै निर्वाचनअघि भ्रष्टाचार र बेथितिविरुद्ध संघर्ष गर्नुपर्ने बताउनुभयो ।
राष्ट्रियता, विकास र सुशासनलाई उपयुक्त ढंगले एमालेको सरकारले मात्र बढाउन सक्ने उहाँको जिकिर थियो । एमालेले राष्ट्रियता, जनजीविका र सुशासनका प्रश्नलाई सम्बोधन गर्न सक्ने भनेको एमालेको सरकार मात्र भएको उहाँको भनाइ थियो ।
अध्यक्ष ओलीले बाह्य सम्बन्धलाई सन्तुलित र उपयुक्त ढंगले अगाडि बढाएर राष्ट्रिय हितको रक्षा गर्न एमालेको सरकारले मात्र गर्न सक्ने भएकाले आगामी निर्वाचनबाट त्यस्तो सरकार गठन गर्न सक्नुपर्ने बताउनुभयो ।
