काठमाडौँ । नेकपा (एमाले) का सांसद डा. सूर्य पाठकले सरकारले संसद्मा प्रस्तुत गरेको नागरिकतासम्बन्धी विधेयकमा संशोधन प्रस्ताव दर्ता गरेका छन् ।
उनले नेपाली नागरिकसँग विवाह गरेर आउने महिलाले ७ वर्षपछि मात्र नागरिकता दिनुपर्ने गरी संशोधन प्रस्ताव दर्ता गरेका हुन् ।
सरकारले भने संसद्मा प्रस्तुत गरेको विधेयकमा विदेशी महिलाले नेपाली नागरिकसँग बिहे गरेलगत्तै नागरिकता पाउने व्यवस्था गरेको छ । सांसद पाठकले त्यस्ता महिलाले नेपालमा लगातार ७ वर्ष बसेपछि मात्र अंगीकृत नागरिकता प्राप्त गर्न व्यवस्था हुनुपर्ने माग गरेका छन् ।
उनको संशोधन प्रस्तावमा गैरआवासीय नेपाली नागरिकता लिन चाहने व्यक्तिले नेपाली नागरिकसरह नागरिकता दिनुपर्ने उल्लेख छ ।
