काठमाडौँ । नेकपा (एमाले) ले एम अधिकारी नेपाल राष्ट्र बैंकका गभर्नर महाप्रसाद अधिकारी नभएको स्पष्टीकरण दिएको छ ।
एमालेको अर्थ तथा योजना विभागको सदस्यमा एम अधिकारीको नाम उल्लेख भएपछि एम अधिकारी भनेको गभर्नर अधिकारी नै भएको भन्दै आलोचना भइरहेको छ ।
गभर्नर अधिकारीले भने एमाले केन्द्रीय कार्यालयलाई पत्र लेखी आफ्नो नाम जोडेर प्रचार भइरहेको भन्दै आफू कुनै पनि पार्टीको सदस्य नरहेको र त्यस्तो सोच्न पनि नसकिने बताएका छन् ।
गभर्नर अधिकारीको पत्रको जवाफमा एमाले केन्द्रीय कार्यालयका सचिव भीष्म अधिकारीले अर्थ तथा योजना विभागमा रहेका एम अधिकारी गभर्नर महाप्रसाद अधिकारी नभएको उल्लेख गरेका छन् । उनले सरकारी सेवामा रहेकालाई पार्टीको कुनै पनि विभागमा राख्ने नीति पार्टीको नरहेको उनले स्पष्ट पारेका छन् ।
यद्यपि जवाफी पत्रमा एम अधिकारी गभर्नर अधिकारी होइन भनिए पनि एम अधिकारी को हुन् त भनी केही पनि बताइएको छैन ।
गभर्नर पार्टीको कार्यकर्ता हुन नमिल्ने भन्दै सत्ताधारी नेपाली कांग्रेस र नेकपा (माओवादी केन्द्र) लगायतका दलले गभर्नर अधिकारीको राजीनामा माग गरिरहेका छन् ।
