काठमाडौँ । नेकपा (एमाले)का अध्यक्ष एवं पूर्वप्रधानमन्त्री केपी शर्मा ओलीले नेपालले आफ्नो भूमि फिर्ता माग्नु अर्घेल्याइँ नभएको बताउनुभएको छ ।
उहाँले सुगौली सन्धिपछि पनि नेपालले कालापानी, लिपुलेक र लिम्पियाधुरा १४६ वर्षसम्म भोगचलन गरेकाले सो भूभाग नेपालकै भएको बताउनुभयो ।
पूर्वराजदूतहरुसँगको मंगलबार भएको छलफलमा अध्यक्ष ओलीले कुनै एउटा सन्दर्भमा कालापानीमा भारतीय फौज आएर बसेको भन्दैमा त्यो भूभाग नेपालको होइन भन्न नमिल्ने बताउनुभयो ।
उहाँले कालापानीमा भारतीय फौज रहेकाले त्यसभन्दा उता लिम्पियाधुरा र लिपुलेकमा नेपालीले प्रवेश गर्नै नसकेको यथार्थ प्रस्तुत गर्नुभयो । “ती भूभाग नेपालको हो भनेर अहिले नेपालीले भन्न नसके पनि केही पछि भन्छन् र भन्नैपर्छ ।”
नेपालले आफ्नो भूभाग फिर्ता चाहियो भन्दा अर्घेल्याइँ नहुने र यसले सम्बन्ध पनि नबिगार्ने उहाँको भनाइ थियो । आफूले भारतीय प्रधानमन्त्रीसँग भएको भेटहरुमा ती भूभागबारे खुलस्त भनाइ राखेको उहाँले बताउनुभयो ।
