काठमाडौं । प्रमुख प्रतिपक्ष दल नेकपा (एमाले)का नेता एवम् सांसद भीम रावलले सरकारले अमेरिकालाई स्टेट पार्टनरसीप प्रोगाम (एमपीपी)मा सहभागि नहुने भनेर पत्राचार नगरेको भन्दै आपत्ति जनाउनुभएको छ ।
सोमबार नयाँबानेश्वरस्थित संसद भवनमा सञ्चारकर्मीहरुसँग कुराकानी गर्दै नेता रावलले सरकारले एसपीपीमा सहभागि नहुने भनेर हालसम्म अमेरिकालाई पत्राचार नगरेको भन्दै आपत्ति जनाउनुभएको हो । उहाँले अमेरिकाले नेपालले सम्झौता रद्ध गर्न सक्ने भनेर भनेको भएपनि नेपाल सरकारले पत्राचार गर्न नसकेको बताउनुभयो । नेता रावलले पत्र नपठाउनुको कारण के हो ? भनेर सरकारलाई प्रश्न समेत गर्नुभयो । उहाँले प्रधानसेनापति, परराष्ट्रमन्त्री, गृहमन्त्री र गठबन्धन दलका नेताहरुले समेत एसपीपीमा नेपाल सहभागि नहुने बताइरहँदा पनि पत्र नपठाएकोप्रति आशंका व्यक्त गर्नुभयो ।
उहाँले भन्नुभयो – ‘अमेरिकी राजदूताबासले यदी नेपालले यो सदस्यता रद्ध गर्ने हो भने गर्न सक्छ भनेर भनिराखेको छ । सार्वजनिक रुपमा भन्यो । तर बालुवाटारमा बैठक बसेर गठबन्धनका नेताहरु सर्वदलिय बैठक बोलाउने भन्ने कुराहरु भन्छन् भन्नेकुरा समचार माध्यममा पढ्न पाइयो । साझेदारी कार्यक्रममा संलग्न हुने बेलामा सर्वदलीय बैठक चाहिएन । अनि यो नेपाल सैनिक अखडा हुन सक्दैन ।
यो हिन्द प्रशान्त रणनीतिको अंग हुन सक्दैन भनेर नेपाली जनताले व्यापक रुपमा आवाज उठाउँदाखेरी, संसदले आवाज उठाउँदाखेरी सरकारका मन्त्रीहरु हामी सैनिक गठबन्धन नजान प्रतिवद्ध छौँ । हामी संलग्न हुँदैनौ भन्ने । त्यो पत्र पठाउन के ले रोक्यो ? यदी उहाँहरु आफ्नो भनाईप्रति इमान्दार हुनुहुन्छ भने अमेरिकास्वयम्ले यदी नेपाल यसको सदस्य हुन चाहादैन भने रद्ध गर्न सक्छ भनिसकेपछि हामी हुन चाहादैनौ भनेर पत्र किन नपठाएको त ? कसले रोक्यो त ? प्रधानसेनापति हुनु हुदैन भन्ने । परराष्ट्र मन्त्री हामी हुँदैनौ भन्ने । गृहमन्त्री संसदमा हुँदैनौ भन्ने । गठबन्धनका नेताहरु यो त हुनु हुँदैन भन्ने । अनि पत्र रोक्ने हात समात्न आएको को रहेछ त ?’
नेता रावलले आगामी निर्वाचनमा समान विचार, दर्शन र कार्यक्रम भएकाहरुसँगमात्रै गठबन्धन गर्नुपर्नेमा जोड दिनुभयो । विपरित सिद्धान्त भएकाहरु बिचको गठबन्धन अनैतिक हुने उहाँको तर्क थियो । उहाँले भन्नुभयो – ‘आगामी निर्वाचनमा यदी नेपालको संविधानको सम्मान गर्ने हो भने समान विचार, समान कार्यक्रम भएकाहरुले मात्रै यस्तो लोकप्रिय मतको लागि एक भएर जानसक्ने हुन्छ । विपरित सिद्धान्त र विचार भएका मान्छेले लोकप्रिय मत मिलेर जान्छौँ भन्ने कुरा अनैतिक कुरा हो ।
निर्वाचन भइसकेपछि कुनै कार्यक्रम लागु गर्नका लागि गठबन्धन गर्ने कुरा त्यो हुन सक्छ । विभिन्न ठाउँमा हुन्छ । तर त्यसको लागि पनि सिद्धान्त, विचार र कार्यक्रममा सामिप्यता हुनुपर्छ । तर यहाँ त पदको लागि मिलेर खाने । छ, छ महिनामा मन्त्री हुने । तिन, तिन महिनामा भागबन्डा गरेर खाउँ । मानौँकी यो कसैको व्यक्तिगत सम्पति हो जस्तो यो राज्य । यस्तो भएको हुनाले मैले त समान विचार, समान दर्शन, समान कार्यक्रम भएकाहरु जहिल्यैपनि सँगै हिड्नुपर्छ । विपरित सिद्धान्त भएका जाने भनेको अनैतिक काम हो म भन्दै आएको छु । त्यसकारण आउने निर्वाचनलाई पनि त्यसरी नै हेर्नुपर्छ भन्ने मेरो धारणा छ ।’
उहाँले मिलेर पद बाँडफाँड गर्नका लागि सत्तारुढ गठबन्धन भएको टिप्पणी गर्नुभयो ।
