काठमाडौं । नेपालले एसीसी महिला टी-ट्वान्टी च्याम्पियनसिपको सेमिफाइनलमा स्थान बनाएको छ ।
मलेसियाको किनरारा ओभलमा सोमबार सम्पन्न खेलमा बहराइनलाई ८ विकेटले हराउँदै नेपाल एक खेल अगावै सेमिफाइनलमा प्रवेश गरेको हो । बहराइनले दिएको १५ रनको लक्ष्य नेपालले ३ ओभर ४ बलमा २ विकेट गुमाएर पूरा गर्यो ।
नेपालका लागि सीता राना मगरले ४ रन जोडिन् । कविता कुँवर ३ रनमा अविजित रहिन् । इन्दु वर्मा सुन्य रनमा आउट हुँदा कप्तान रुबिना क्षेत्री सुन्य रनमा अविजित रहिन् । ८ रन नेपालले अतिरिक्त पायो ।
बहराइनकी पभिथ्र सेट्ठी र भिल्सिटा बार्बोजाले एक एक विकेट लिए । त्यसअघि पहिले ब्याटिङ गरेको बहराइनले निर्धारित ७ ओभरमा ६ विकेट गुमाएर १४ रन बनाएको थियो ।
वर्षाको कारण खेल ७ ओभरमा झारिएको थियो । बहराइनकी इशारा सुहुनले ६ रन जोडिन् । कप्तान दिपिका रासंगिका र थरंगाले समान दुई–दुई रन जोडे । नेपालकी कविता कुँवर र सबनम राईले २र२ विकेट लिए भने
अश्मिना कर्माचार्यले १ विकेट लिइन् ।
समूह ‘बी’ मा रहेको नेपाल शीर्ष स्थानमा रहेको छ । नेपालले ३ खेलमा ६ अंक जोडेको छ । अब नेपालले अन्तिम खेल मंगलबार हङकङसँग खेल्नेछ ।
च्याम्पियनसिपमा १० टोलीको सहभागिता रहेको छ । नेपाल समूह ‘बी’मा रहेको छ । जुन समूहमा हङकङ, कुवेत, भुटान र बहराइन रहेका छन् । यस्तै, समूह ‘ए’ मा मलेसिया, युएई, ओमान, कतार र सिंगापुर रहेका छन् ।
समूह चरणको खेलपछि शीर्ष दुई टोलीले सेमिफाइनलमा स्थान बनाउने छन् । च्याम्पियनसिपको फाइनल पुग्ने दुई टोली महिला टी–ट्वान्टी एसिया कप क्रिकेटमा छनोट हुनेछ ।
